Tryggleiken i nord blir stadig viktigare. EU og Noreg har felles interesser knytte til stabilitet, berekraftig utvikling og robust infrastruktur i Arktis. I innspelet legg regjeringa tydeleg vekt på den gjensidige nytta av partnarskap i EU sin reviderte arktisstrategi og på moglegheitene for eit breiare samarbeid i Arktis.

Regjeringa peikar òg på behovet for at EU sin arktispolitikk byggjer på god forståing av faktiske forhold og solid kunnskap om regionen. Vidare blir det understreka at all aktivitet i Arktis må skje i tråd med folkeretten, inkludert Havrettskonvensjonen (UNCLOS).

Innspelet gir òg tilrådingar om tema som til dømes maritim tryggleik, romverksemd, energitryggleik, berekraftig hav- og ressursforvaltning, kritisk infrastruktur, klima og miljø, robuste lokalsamfunn, forsking og urfolksspørsmål.

Utanriksdepartementet har utarbeidd innspelet i samarbeid med relevante departement og har involvert norske aktørar i prosessen, mellom anna gjennom eit ope innspelsmøte 26. februar.

Revisjonen av EU sin arktispolitikk er forventa ferdig innan hausten 2026.