– Vi vil tydeleggjere prioriteringa av spelemidlar til kulturføremål. Det handlar om å bygge opp om kulturfrivilligheita og sikre aktivitet i heile landet. Dette er eit viktig prosjekt for regjeringa. Og så veit vi at ei forskrift er noko organisasjonane har ønskt seg lenge, seier kultur- og likestillingsminister Lubna Jaffery.

Den nye forskrifta skal tydeleggjere at spelemidlar til kulturføremål i hovudsak skal gå til:

  • kulturfrivilligheit
  • kulturtiltak for barn og unge
  • kulturarenaer og utstyr
  • andre kulturføremål som i hovudsak er retta mot barn og unge

Forskrifta er ei oppfølging av Rom for deltakelse – regjeringens kulturfrivillighetsstrategi (2023 – 2025).

Høyringsfristen er 19. desember 2025. Departementet vil gå gjennom svara og fastsette endeleg forskrift så snart som mogleg etter fristen.