– Nesbyen blei hardt ramma av ekstremvêret Hans i 2023, og arbeidet med å beskytte Nesbyen sentrum mot framtidige flaumskadar må kome raskt i gang, seier energiminister Terje Aasland.

I statsbudsjettet for 2026 blei flaumsikringa av Nesbyen sentrum anslått til 300 millionar kroner. I lys av ny kunnskap og grundigare kostnadsberekningar har kostnadsanslaget for prosjektet no auka med 160 millionar kroner til 460 millionar kroner. Regjeringa foreslår derfor at den øvre kostnadsramma for gjennomføring av sikringsarbeida blir sett til 630 millionar kroner, med ei styringsramme på 460 millionar kroner.   

Det skal gjennomførast ei heilskapleg flaumsikring av Nesbyen sentrum, som i dag er utsett for flaum frå elvene Hallingdalselva og Rukkedøla. Sikringstiltaka vil bestå av blant anna flaumvollar, pumpestasjonar og erosjonssikring.

– Klimaendringane gir meir ekstremvêr, og me må derfor førebyggje enda meir mot naturskade framover, seier Aasland.

Noregs vassdrags- og energidirektorat (NVE) planlegg for utlysing av anbodskonkurransar for delar av arbeida i 2026. Sikringsarbeidet er venta å gå føre seg fram til 2030.