Rekordhøgt beløp til kulturen i 2025

– I årets fordeling styrker vi blant anna Kulturrom, tiltak til leselyst og Den kulturelle skulesekken. Det vi ønsker, er eit mangfald av kulturaktivitetar for små og store over heile landet, seier kultur- og likestillingsminister Lubna Jaffery.

Regjeringa vil framleis prioritere kunst og kultur og sikre at alle, uavhengig av bakgrunn, kan delta i kulturlivet.

Deltaking og leselyst

– Vi ønsker at fleire skal få spele i korps og spele teater, eller engasjere seg i andre kulturaktivitetar. Fordelinga vi no har gjort, når breitt ut i landet, seier kultur- og likestillingsministeren.

I årets fordeling har regjeringa prioritert tiltak som følgjer opp to viktige arbeid som regjeringa har lagt fram, Leselyststrategien og Handlingsplanen for deltaking.

Regjeringa aukar blant anna tildelinga til Den kulturelle skulesekken med 40 millionar kroner, 17 millionar kroner går til leselysttiltak og litteratur, 3,2 millionar kroner meir til Ungdom og Fritid og 21 millionar kroner meir til Kulturrom.

Eit viktig satsingsarbeid har vore å gje kulturlivet tilgang til gode kulturlokale. Tilskotet til Kulturrom er styrkt med 21 millionar kroner, og med totalt 86 millionar i potten for 2025 vil det bidra til gode og berekraftige arenaer for både å utøvarar og publikum, i heile landet. 

Dramatikk, skværriggarar og Fosse

I årets fordeling er det sett av ekstraordinære tilskot til fleire viktige kulturtiltak, som 28 millionar kroner i støtte til skværriggarane Christian Radich (20 millionar kroner), Statsraad Lehmkuhl og Fullriggeren Sørlandet (4 millionar kroner kvar), knytt til vedlikehald.

Andre satsingar er:

• 10 millionar kroner meir til Frifond-ordningane
• 5 millionar kroner til oppfølging av NOU 2023: 20 Tegnspråk for livet
• 5 millionar kroner meir til amatørteater
• 4 millionar kroner meir til insentivordning for ny dramatikk
• 3 millionar kroner meir til arkivtiltak
• 3 millionar kroner meir til museumstiltak

Som ein del av regjeringa si satsing på kulturelt mangfald og inkludering blir 2 millionar kroner fordelt til FNs markering for personar av afrikansk opphav. Midlane skal mellom anna bidra til å fremje medvit om afrikansk kulturarv og historie og styrke inkludering.

2 millionar kroner går også til forprosjektet for Jon Fosse-senteret i Strandebarm. Senteret skal bli eit nasjonalt samlingspunkt for Jon Fosses litterære arv og styrke formidlinga av norsk samtidslitteratur.

Regjeringa har fordelt årets pott på 1 196,5 millionar kroner slik:

Tiltak	Fordeling (NOK)
Den kulturelle skulesekken	390 000 000
Frifond	220 000 000
Regionale kulturbygg – desentralisert ordning	89 500 000
Kulturrom	86 000 000
Bibliotektiltak	56 700 000
Amatørteatertiltak	36 600 000
Nasjonale musikkorganisasjonar	35 600 000
Museumstiltak	30 250 000
Skværriggarane	28 000 000
Instrumentfondet	21 000 000
Arkivtiltak	18 000 000
Leselyststrategi og litteratur	17 000 000
Ungdom og Fritid	17 000 000
UKM – Ung Kultur Møtes	14 900 000
Tilskot til barne- og ungdomstiltak	14 755 000
Tilskotsordningar for kor	14 200 000
Inkludering i kulturliv	13 000 000
Scenekunsttiltak	11 000 000
Rekruttering og deltaking – korps og orkester	10 845 000
Folkeakademienes Landsforbund	9 740 000
Insentivordning for ny norsk dramatikk	9 000 000
Krafttak for sang	7 610 000
Teiknspråktiltak	5 050 000
Nynorsk bedriftsforum	950 000
Kulturstøtta	4 280 000
Ordningar for kordirigentar	3 580 000
Norske kirkeakademier	2 385 000
FNs tiårsmarkering for personar av afrikansk opphav	2 000 000
Jon Fosse-senter forprosjekt	2 000 000
Totalt	1 196 458 000