Styrkjer kampen mot cyberkriminalitet i Norden og Baltikum

– Cyberkriminalitet er i dag ein av dei største og raskast veksande kriminalitetstruslane vi står overfor. Noreg løfta behovet for å tenkje nytt. Vi må i større grad førebyggje og avverje i tillegg til å etterforske, seier statssekretær i Justis- og beredskapsdepartementet Kristine Kallset, som deltok på møtet frå norsk side.

Det nordisk-baltiske ministermøtet omfatta også temaa organisert kriminalitet, samarbeid med Ukraina og effektive domstolar.

Datakriminalitet og digitale bedrageri skjer raskt, rammar breitt og kan få alvorlege konsekvensar for både enkeltpersonar, verksemder og kritisk infrastruktur. Samstundes gjer ny teknologi, særleg kunstig intelligens, det enklare for kriminelle å nå mange offer samtidig og auke omfanget av kriminaliteten.

På møtet tok Noreg til orde for tettare samarbeid mellom landa og med privat sektor og akademia, for å redusere handlingsrommet til kriminelle aktørar.

Profittmotivert cyberkriminalitet genererer store inntekter og blir i aukande grad driven av organiserte nettverk som opererer på tvers av landegrenser. Omfanget er så stort at ikkje alle saker kan etterforskast fullt ut, noko som bidreg til låg oppdagingsrisiko.

– Skal vi få ned omfanget, må vi ta i bruk teknologi og bruke ressursane smartare. Førebygavverging, avverjing og kunnskapsdeling er avgjerande. Her er vi heilt avhengige av tett internasjonalt samarbeid, seier Kallset.

Dei nordiske og baltiske landa deler mange av dei same utfordringane, og møtet i Helsinki stadfesta eit felles ønske om ein meir samordna innsats mot cyberkriminalitet.