Det var sett av 8 millionar kroner til ordninga, med 500 000 kroner per seter. Fyrste utbetaling skjer i år. Dei som får tilskot, forpliktar seg til å drive mjølkeproduksjon på setra i minst ti år framover. Landbruksdirektoratet fekk i alt inn 118 søknader. Dei 16 setrane fordeler seg på seks fylke.

– Det er gledeleg at aktive brukarar no kan setje i gang med framtidsretta opprusting av setrane i Noreg. Det er positivt at så mange har søkt på det nye investeringstilskotet med den langsiktige forpliktinga, og at nyvinninga har blitt så godt motteke. Det vitnar om framtidstru og engasjement for denne levande norske kulturen, seier landbruks- og matminister Nils Kristen Sandtrøen.

I årets jordbruksoppgjer vart ordninga styrkt. Avtalepartane auka ramma for tilskotet for 2026 med 2 millionar kroner. For 2027 vart ordninga styrkt med 5 millionar kroner, til totalt 11 millionar kroner, som gjer at fleire brukarar kan få innvilga tilskot neste år.

Talet på setrar i Noreg har vore i kraftig tilbakegang, og er om lag halvert dei siste 20 åra. Den nye tilskotsordninga er eitt av fleire grep for å støtte opp om aktiv seterdrift. Setring er viktig for å nytte utmarksressursane. I tillegg bidreg det til å oppretthalde det biologiske mangfaldet. Fleire sjeldne planter og insekt lever i kulturlandskap med beitande dyr. 

I 2024 vart den norske seterkulturen teken inn på UNESCO si liste over immateriell kulturarv. Denne kulturarven omfattar kunnskap om landskapet og bruk av dei lokale naturressursane med beiting og fôrhausting. Ysting og lokale stadnamn på setrane er også ein del av vår levande kultur.

– Ei styrking av seterdrifta bidreg til å følgje opp Noreg sine forpliktingar etter at seterkulturen vart skriven inn på UNESCO-lista, seier landbruks- og matminister Nils Kristen Sandtrøen.

I tillegg til styrking av seterordninga vart det gjort fleire grep i årets jordbruksoppgjer for å støtte opp om setringa. Minstesatsane for setring over Regionalt miljøprogram vart auka, satsinga på fjellandbruket vidareført og tilskot til setrar vart prioritert over IBU-ordninga. Vidare vart tildelingane over tiltak i Utvalde kulturlandskap i jordbruket og verdsarvområda auka, noko som også er viktige ordningar for å ta vare på seterdrifta.