Utanriksminister Eide deltok på Austersjørådets ministermøte

– Dei ti medlemslanda i Austersjørådet er nære partnarar, og vi har ei lik forståing av tryggingsutfordringane vi står overfor, seier utanriksminister Eide. – Det er derfor viktig at vi snakkast ofte.

Kritisk undersjøisk infrastruktur er eit tema som ofte står på dagsorden når det blir snakka om felles tryggingsutfordringar. I Austersjøen er dette spesielt aktuelt.

– I Noreg er vi mest aktive i dette arbeidet som gjeld Nordsjøbassenget. Her deltek vi aktivt i det internasjonale samarbeidet for å sikre energirøyrleidningar og sjøfiberkablar. Og vi støttar sjølvsagt opp om arbeidet for tryggleik i Austersjøen òg, seier Eide.

Estland leier Austersjørådet for tida. Dei hadde lagt ministermøtet til idylliske Vihula, utanfor hovudstaden Tallinn.

Austersjørådet samlar dei dei fem nordiske landa (Danmark, Finland, Island, Noreg og Sverige), dei tre baltiske (Estland, Latvia og Litauen), Polen og Tyskland. I tillegg deltok EU sin utanriksteneste, EEAS. Hovudfokuset for årets ministermøte var spørsmål knytte til tryggleik i Austersjøregionen og nærområda.

I erklæringa si frå møtet understreka dei ti medlemslanda at dei står samla i si støtte til Ukraina på vegen mot framtidig medlemskap i EU og Nato. Dei fordømmer Russland sin angrepskrig mot Ukraina og brot på folkeretten.

– Sanksjonane mot Russland må styrkjast, og Russland må kompensere Ukraina for krigsskadane. Landa vil styrkje forsvaret mot Russlands bruk av hybride midlar for å undergrave dei demokratiske samfunna våre ved bruk av sabotasje, cyberangrep og desinformasjon. Vi vil òg samarbeide tettare for å verne kritisk undersjøisk infrastruktur, som kablar og røyrleidningar på havbotnen, seier utanriksminister Eide.

Ein eigen avtale (MoU) om dette blei underteikna på ministermøtet.

– Sidan 2024 har alle dei ti medlemslanda i Austersjørådet vore medlemmer av Nato. Vi kan no samarbeide endå tettare, og det styrkjer vår felles tryggleik. Det er viktig i den alvorlege tryggingssituasjonen vi står i, seier Eide

Til årets ministermøte blei det levert ein rapport om Austersjørådets framtid. Dei ti medlemslanda gav si støtte til hovudtilrådinga om at rådet bør styrkje samarbeidet om nettopp tryggingsspørsmål. Polen overtek formannskapet i juli og skal leie omstillinga av rådet det neste året.

Før utanriksministeren reiser frå Estland, skal han delta i ein paneldebatt om korleis dei nordisk-baltiske landa blir stadig viktigare for tryggleik og politikkutvikling i Nord-Europa. Dette skjer i ramma av den tryggingspolitiske Lennart Meri-konferansen i Tallinn.