Ordninga blei etablert i ein periode med svært høge kraftprisar og store prisforskjellar mellom ulike delar av landet. Formålet er å redusere risikoen for auka nettleige i område med høge kraftprisar, som følgje av auka kostnader til nettap i regional- og distribusjonsnettet.

Kraftmarknaden har i stor grad normalisert seg samanlikna med situasjonen då ordninga blei innført. Samtidig kan det framleis oppstå periodar med høge kraftprisar og betydelege prisforskjellar mellom budområda.

– Situasjonen er annleis i dag enn då ordninga blei innført. Samtidig er det framleis usikkerheit knytt til utviklinga i kraftmarknaden. Me ønskjer derfor å vidareføre eit verkemiddel som kan takast i bruk dersom forholda igjen skulle gjere det nødvendig, seier energiminister Terje Aasland.

Flaskehalsinntektene kjem norske nettkundar til gode gjennom lågare nettleige over tid. Den midlertidige ordninga gjer det mogleg å tilbakeføre delar av inntektene raskare og meir målretta til område med høge kraftprisar. Sidan ordninga blei innført i 2022 er det utbetalt om lag 10,6 milliardar kroner til regionale og lokale nettselskap.

– Gjennom ordninga er det tilbakeført over 10 milliardar kroner til kundar i område med høge kraftprisar. Erfaringane viser at ordninga har vore eit nyttig supplement til dei andre tiltaka Arbeidarparti-regjeringa har gjennomført for å skjerme straumkundar mot høge kostnader, seier Aasland.

Det er usikkert om det vil bli grunnlag for utbetalingar gjennom ordninga i 2027. Dette vil blant anna vere avhengig av utviklinga i kraftprisane, prisforskjellane mellom budområda og storleiken på tilgjengelege flaskehalsinntekter.