Volda er årets nynorskkommune
Nyheit | Dato: 13.10.2026 | Kultur- og likestillingsdepartementet
Annakvart år heidrar regjeringa innsatsen til kommunane i Noreg som bidreg til å bevare nynorsken. I år var det Volda som fekk prisen, for det solide arbeidet kommunen har gjort for og på nynorsk gjennom mange år.
Juryen skriv at arbeidet med nynorsk språk og kulturarv er del av den daglege drifta av kommunen, med eit medvit om dei lange tradisjonane nynorsken og målreisinga har i Volda.
Volda legg også særleg vekt på lesing og litteratur på nynorsk, mellom anna med prosjekt på ungdomskulen og samarbeid mellom fleire instansar for å fremje leseglede. Kommunen jobbar også aktivt for at næringslivet skal nytte nynorsk.
Kultur- og likestillingsminister Lubna Jaffery delte ut prisen på eit arrangement på Nasjonalbiblioteket i Oslo den 13. oktober. Prisen er på 200 000 kroner.
Språkrådet forvaltar arbeidet med prisen på vegner av Kultur- og likestillingsdepartementet, med ein jury med representantar frå KS, Landssamanslutninga av nynorskkommunar, Noregs Mållag, Nynorsk kultursentrum og Språkrådet.