– For Arbeidarparti-regjeringa er det viktig å bidra til produksjon, aktivitet og utvikling i den norske filmbransjen, som no står i ei krevjande tid. Norsk film og norske seriar fortel historier som samlar oss og styrker norsk språk, kultur og ytringsmangfald, og derfor styrker vi filmfeltet i dette budsjettet, seier kultur- og likestillingsminister Lubna Jaffery (Ap).

Regjeringa foreslår auka løyvingar til Filmfondet, insentivordninga og ei ny tilskotsordning for oppgradering av digitalt kinoutstyr. 47 millionar kroner går til Filmfondet, 15 millionar til insentivordninga for film- og serieproduksjon og 5 millionar kroner til ei ny tilskotsordning for oppgradering av digitalt kinoutstyr.

Løyvingane til film- og dataspillformål, inkludert prisomrekning, aukar med totalt om lag 75 millionar kroner.

– Arbeidarparti-regjeringa vil at folk i heile landet skal ha tilgang til gode kinoopplevingar også i åra framover, og derfor opprettar vi ei ny tilskotsordning til oppgradering av digitalt kinoutstyr, seier Jaffery.

Regjeringa foreslår også at NRK-plakaten blir oppdatert med eit krav om at NRK skal bidra til utvikling og produksjon av norsk spelefilm, drama og dokumentar.

I tillegg vil regjeringa legge fram ei stortingsmelding om film som mellom anna skal vurdere korleis dei statlege verkemidla fungerer i møte med endringane i bransjen.