Ekspertgruppa skal leiast av professor Silje Haus-Reve.

Vil sørge for at doktorgradsutdanningane er relevante

– På 20 år er talet på dei som tek doktorgrad meir enn dobla. Samstundes er det uvisst kor godt denne veksten treff behovet for utvikling, verdiskaping og kompetanse, både i akademia og i arbeidslivet. Vi treng ei heilskapleg vurdering av korleis framtidas forskarutdanning bør sjå ut for å treffe best mogleg, og det sørger vi for no, seier forskings- og høgare utdanningsminister Sigrun Aasland (Ap).

Tiltaket om å etablere ei ekspertgruppe blei først omtalt i regjeringa si stortingsmelding om forskingssystemet som blei lagd fram i mars 2025, Meld.St. 14 (2024-2025) Sikker kunnskap i en usikker verden.

Rapport klar mars 2027

Ekspertgruppa skal gi konkrete tilrådingar til styresmakter, forskingsinstitusjonar og privat og offentleg arbeidsliv om tiltak som kan styrke kvalitet og relevans i doktorgradsutdanninga. Dei skal levere rapporten sin til Kunnskapsdepartementet innan 1. mars 2027.

Ekspertgruppa skal vurdere dei noverande rammene for forskarutdanninga og det samla bidraget hennar til samfunnet. Gruppa skal gi råd om konkrete tiltak for å innrette framtidas forskarutdanning slik at forskarkompetansen kjem samfunnet best mogleg til gode. Tilrådde tiltak kan inkludere vidareutvikling av eksisterande verkemiddel eller nye verkemiddel.

Kvalitet i forskarutdanninga skal vere eit førande prinsipp for arbeidet til ekspertgruppa.

Ekspertgruppa skal gjere vurderingar og tilrå tiltak separat for desse fagområda:

  • Helse
  • Samfunnsfag og humaniora
  • Teknologi og naturvitskap

Sammensetjinga av ekspertgruppa

Ekspertgruppa består av åtte medlemmar som til saman har brei kompetanse om forskingssektoren og forskarutdanninga, og om norsk og internasjonalt arbeidsliv.

I tillegg til leiar Silje Haus-Reve, professor i innovasjon og regionale studiar ved UiS og forsker II ved Norce, består ekspertgruppa av desse medlemmane:

  • Jonas Stein, viserektor, UiT (nestleiar)
  • Jan Magnus Aronsen, førsteamanuensis, UiO/ OUS
  • Asgeir J. Sørensen, professor, NTNU
  • Linn Merete Sandvoll, leiar og nærings-PhD-kandidat, Kongsberg Defence & Aerospace
  • Lise Rye, professor, NTNU
  • Taran Thune, professor, UiO/ forsker I, NIFU
  • Bjarte Bye Løfaldli, forskingsleiar, Kristiansund kommune, førsteamanuensis, HiMolde
  • Lene Tanggaard Pedersen, professor, Aalborg Universitet

Medlemmane skal ikkje representere sin eigen institusjon eller organisasjon, men deltek i kraft av si personlege ekspertise og erfaring.