– Dette er ei viktig endring som framover vil gi studentane betre kjøpekraft, og frå neste haust vil dei få 7000 kroner meir i studielån enn i år. Det vil gi studentane meir tid til å studere og sørge for at dei i større grad heng med lønnsveksten, seier forskings- og høgare utdanningsminister Eileen Fugelsnes (Ap).

Denne koplinga til grunnbeløpet i folketrygda (G) har vore etterspurd av studentorganisasjonar i mange år.

7000 kroner meir i basislån

I dag blir basislånet justert etter prisveksten i samfunnet. Det har gjort at studentane ikkje har fått auka kjøpekraft når lønnsveksten har vore høgare enn prisveksten.

Forslaget frå regjeringa fastset utdanningsstøtta til det forholdet til grunnbeløpet i folketrygda som er no, som er 1,25 G. Det vil gi studentane same vekst i støtta som lønnsveksten, og dei vil i større grad ta del i velstandsutviklinga i samfunnet.

Med forslaget vil basislånet for studieåret 2027-28 auke med 4,21 prosent, som er litt over 7 000 kroner samanlikna med studieåret 2026-27.

– Arbeidarparti-regjeringa har dei siste åra gitt studentane eit stort økonomisk løft. Frå neste haust får studentane 51 000 kroner meir utbetalt enn da regjeringa tiltrådte i 2021, seier Fugelsnes.

3050 nye studentbustader

Regjeringa foreslår å gi tilsegn til å bygge eller rehabilitere 3 050 fleire studenthyblar. Pressområde med låg dekningsgrad vil bli prioritert.

– Den største enkeltutgifta for dei fleste studentar er husleiga. Eit av dei viktigaste grepa vi kan ta for å betre økonomien til studentane, er å bygge fleire rimelege studentbustader. Dette har regjeringa gjort, og det skal vi halde fram med. Målet vårt er å bygge 12 000 nye studentbustader i løpet av regjeringsperioden, seier Fugelsnes.

I fjor vart det ferdigstilt rekordmange studentbustader, og i løpet av 2026 vil det vere 4 500 studentbustader under bygging.

60 millionar til straumstøtte i studentbustader

Regjeringa foreslår òg 60 millionar til ordninga med straumstøtte til studentsamskipnadene og studentbustadstiftingane. Pengane skal kompensere for auka straumutgifter i studentbustader med felles straummåling, slik at husleiga ikkje må setjast opp.

– For Arbeidarpartiet er det viktig å sørge for at studentane ikkje betaler meir for straumen enn resten av befolkninga. Med denne straumstøtta skjermar vi studentar som bur i studentbustader, mot høgare husleige, seier Fugelsnes.

Aukar også bortebuarstipendet

Regjeringa vil òg styrke bortebuarstipendet for elevar som tek vidaregåande opplæring utanfor foreldreheimen, ved å knyte bortebuarstipendet til grunnbeløpet i folketrygda. Med forslaget vil bortebuarstipendet, på same måte som basislånet, auke med 4,21 prosent, frå 7015 kroner til 7310 kroner i månaden.