Statsbudsjettet 2027
Regjeringa vil styrke Noregs digitale infrastruktur med 40 millionar kroner
Pressemelding | Dato: 07.10.2026 | Digitaliserings- og forvaltningsdepartementet
– Digital infrastruktur er avgjerande for Noregs beredskap. Nødetatar, Forsvaret, helsevesenet, bankane, transportsektoren og offentleg forvaltning er avhengige av mobilnett, fiber, datasenter og digitale tenester. Når den digitale infrastrukturen sviktar, rammar det heile samfunnet. Derfor er det viktig å styrke den digitale infrastrukturen i heile landet, seier digitaliserings- og forvaltningsminister Torgeir Micaelsen (Ap).
I statsbudsjettet for 2027 foreslår regjeringa å auke løyvinga til telesikkerheit og beredskap med 40 millionar kroner for å styrke Noregs digitale infrastruktur utover prisjustering. Det gir eit samla forslag til løyving på 451,3 millionar kroner.
15 millionar kroner av den auka løyvinga er sett av til arbeidet med å styrke utbygginga av det som kallast forsterka ekom i landets kommunar. Forsterka ekom betyr at mobilnetta i eit område i ein kommune får tre døgns reservestraum. Regjeringa foreslår å fordele 25 millionar kroner av auken til å klargjere sivil infrastruktur for militære behov.
Ekstremvêr rammar stadig oftare både folk og kritisk infrastruktur. Det har vi sett fleire døme på dei siste åra, mellom anna under stormen Amy, då kommunar mista mobil- og internettdekning over lengre tid og fleire hundre basestasjonar vart sette ut av drift.
– Når kriser, uvêr eller andre uventa hendingar rammar, er det avgjerande at mobil- og breibandsnetta fungerer. Med dette budsjettforslaget følger regjeringa opp nasjonal sikkerheitsplan for digital infrastruktur, mellom anna ved å styrke mobilnetta med meir reservestraum og andre tiltak som gjer dei meir robuste, seier Micaelsen.
Frå 2014 til 2025, blei det løyvd pengar til forsterka ekom i 112 kommunar. Nasjonal sikkerheitsplan for digital infrastruktur, som regjeringa la fram hausten 2025, legg opp til 100 nye kommunar i planperioden 2026-2030. Om lag 20 av desse blir bygde ut i 2026. Budsjettforslaget for 2027 legg opp til ytterlegare to kommunar per år i planperioden.