IDA leverer sterke resultat i kampen mot global fattigdom

Ekstrem fattigdom globalt har falle kraftig dei siste tiåra, og ein viktig bidragsytar er Verdsbankens International Development Association, også kjend som IDA. Dette er banken for dei 78 fattigaste landa i verda. Nyleg blei resultata for den siste strategiperioden (worldbank.org)  lagde fram.

Rapporten viser mellom anna at:

• 224 millionar menneske har fått grunnleggjande helsetenester.
• 138 millionar menneske har fått tilgang til internett.
• 122 millionar menneske har fått tilgang til sosiale tenester.
• 55 millionar menneske har fått tilgang til, eller forbetra tilgang til, straum.

Tilgang til straum gir barn høve til å gjere lekser. Internett opnar dører til samfunnsdeltaking og digitale tenester. Helse, utdanning og sosiale sikringsnett legg grunnlaget for at menneske kan komme seg ut av fattigdom.

– Noreg har i denne perioden bidrege med over 3,2 milliardar kroner fordi vi veit at dette er ein svært effektiv måte å få bukt med fattigdom. For kvar krone vi puttar inn, kjem det 3,5 kroner ut i bistand. Denne forma for katalytisk hjelp vil bli endå viktigare i tida framover, no som den samla hjelpa har gått ned, seier utviklingsminister Åsmund Aukrust.

Eit stort spleiselag

Årsaka til at IDA er spesielt effektiv, er at det er eit stort spleiselag. Land som Noreg bidreg både med pengar og med garantiar. IDA tilbyr fattige land rimelege lån som blir garanterte med kredittverdigheit til Noreg og andre land. I tillegg gir dei hjelp til konkrete prosjekt. I sum blir finansieringsvolumet 3,5 gonger større enn det givarlanda skyt inn.

Derfor bidreg Noreg med over fem milliardar kroner til IDA i 2026–2028.

– Å få bukt med fattigdom er eitt av dei viktigaste målsetjingane med norsk hjelp. Gjennom over 60 år har IDA vore eitt av dei kraftigaste verktøya i kampen mot fattigdom. Det kanskje aller sterkaste beviset for effekten av banken, er at 23 land som tidlegare tok imot IDA-støtte, no sjølve bidreg økonomisk til ordninga. Dette viser korleis investeringar i dei fattigaste landa gir varige resultat og bidreg til å byggje meir robuste økonomiar, seier Aukrust.