Noreg gir 10 millionar kroner til offer for krig og grove overgrep

Bidraget er ein del av Noreg si langsiktige støtte til offer for dei mest alvorlege internasjonale brotsverka og til Den internasjonale straffedomstolen sitt arbeid for ansvarleggjering og rettferd.

– Når verda reagerer på krigsbrotsverk og stiller dei skuldige til ansvar, må vi samstundes hugse lidingane til offera. Med dette bidraget ønskjer vi å bidra til at menneske som er råka av krigsbrotsverk, brotsverk mot menneskeslekta og folkemord, får støtte til rehabilitering og til å byggje opp att liva sine, seier utanriksminister Espen Barth Eide.

Trust Fund for Victims er oppretta av medlemslanda i Den internasjonale straffedomstolen. Fondet gir bistand til offer og familiane deira, mellom anna gjennom rehabilitering, psykososial støtte og tiltak som kan hjelpe menneske tilbake til eit normalt liv.

– Rettferd handlar ikkje berre om å stille dei ansvarlege til ansvar. Det handlar òg om å støtte menneska som er råka. Difor er fondet ein viktig del av det internasjonale arbeidet for rettferd, seier Eide.

Noreg har i mange år vore ein sterk støttespelar for Den internasjonale straffedomstolen og det internasjonale strafferettssystemet. Bidraget kjem på eit tidspunkt då domstolen møter store utfordringar og aukande press.

– Når internasjonale institusjonar blir utfordra, er det viktig å stå opp for rettsstatsprinsippa. Støtta til fondet viser Noreg si klare støtte til internasjonal strafferett, til offera og til kampen mot straffefridom, seier utanriksministeren.

Bidraget blir forvalta av Norad.