Noreg gir 100 millionar kroner til FNs program for tropisk skog
Nyheit | Dato: 19.12.2025 | Klima- og miljødepartementet
Det norske bidraget blei kunngjort under eit møte mellom klima- og miljøminister Andreas Bjelland Eriksen og den nye leiaren for FNs utviklingsprogram, Alexander De Croo.
– Gjennom FNs program hjelper vi styresmakter som arbeider for å ta vare på tropisk skog. Dette er heilt avgjerande for klimaet på jorda og det biologiske mangfaldet, seier klima- og miljøminister Andreas Bjelland Eriksen.
Fredag 19. desember møtte han leiaren for FNs utviklingsprogram, Alexander De Croo. I samband med De Croo sitt besøk til Noreg kunngjorde klima- og miljøministeren at Noreg skal bidra med 100 millionar kroner i 2026 til FNs program for å redusere utslepp frå avskoging og skogforringing (UN REDD Programme).
FNs utviklingsprogram (UNDP) har saman med FNs miljøprogram (UNEP) og FNs organisasjon for ernæring og landbruk (FAO) ei viktig rolle i dette arbeidet.