– Eit sterkt lokalt sivilsamfunn er heilt avgjerande for demokrati og inkludering i politiske prosessar. Derfor er dette viktig for Arbeidarparti-regjeringa. Altfor ofte er dei som er mest avhengige av havet dei som har minst innverknad over korleis det blir forvalta. Når vi no styrkjer lokale kystsamfunn, styrkar vi både mattryggleik og natur, seier utviklingsminister Åsmund Aukrust.

Skal gi meir makt til småskalafiskarar og kystsamfunn

Småskalafiskeri står for minst 40 prosent av fangsten i verda og gir arbeid til rundt 60 millionar menneske. Mange kystsamfunn er direkte avhengige av havet for mat, arbeid og inntekt, samtidig som dei blir hardt ramma av klimaendringar, ulovleg fiske og auka press på naturen.

Desse utfordringane står sentralt når Our Ocean-konferansen går føre av seg i Mombasa i Kenya denne veka, for første gong på det afrikanske kontinentet. Her møtest styresmakter, organisasjonar og næringsliv for å leggje fram nye, frivillige forpliktingar for å verne havet og styrkje berekraftig bruk av ressursane.

Noreg har inngått ein avtale med WWF-Norge om eit nytt program for å styrkje sivilsamfunn og lokalsamfunn som forvaltarar av kyst- og havressursar. Avtalen blir annonsert under Our Ocean-konferansen i år. Programmet har ei ramme på 126 millionar kroner og varer frå 2026 til 2028.

Innsatsen vil særleg rettast mot land i Aust-Afrika og det sørvestlege Indiahavet, mellom anna Kenya, Madagaskar, Mosambik og Tanzania, og dessutan Indonesia.

Skal skape arbeidsplassar og investeringar

Ein viktig del av avtalen er å vidareutvikle eit program som støttar lokale bedrifter i det sørvestlege Indiahavet. Dette er eit område med stort artsmangfald, men som blir utfordra av overfiske og uregulert verksemd.

Målet er å få fram fleire levedyktige bedrifter og investeringar som gir folk i kystsamfunn betre høve til å tene pengar og skape berekraftige levebrød, samtidig som naturen blir forvalta på ein god måte. Avtalen omfattar òg arbeid med å utvikle ein meir berekraftig havøkonomi og sterke, levedyktige kystsamfunn.

– Vi kombinerer lokale tiltak med strategisk arbeid for å påverke rammevilkår og investeringar. Programmet skal bidra til at både styresmakter og finanssektoren i større grad prioriterer løysingar som er gode for natur, klima og levebrød, seier statssekretær Astrid Bergmål, som deltok på lanseringa av programmet under Our Ocean-konferansen.

Vil påverke politikk og avgjerder

Programmet skal òg styrkje rolla til sivilsamfunnet i natur- og klimapolitikken. Sivilsamfunnet er ei sentral drivkraft for å få til betre forvaltning, betre avgjerder og meir berekraftige investeringar. Dette kan gi fleire arbeidsplassar og auka verdiskaping lokalt, samtidig som investeringar i større grad støttar berekraftig bruk av havet.

Programmet byggjer på erfaringa av at berekraftig havforvaltning krev klare rammer, godt kunnskapsgrunnlag og involvering av dei som lever av ressursane. Dette er prinsipp som òg har vore viktige i norsk forvaltning av hav og fiskeri.