– Å sikre universelle rettar for arbeidstakarar er ei viktig prioritering for Noreg. Internasjonalt samarbeid på dette området er svært viktig, og Noreg har mykje å bidra med i slike forum, seier Kjetil Vevle, statssekretær i Arbeids- og inkluderingsdepartementet.

Under Sør-Afrika sitt formannskap skal G20 blant anna diskutere inkluderande vekst og ungdomssysselsetjing, likestilling i arbeidslivet, ulikskap og rettferdige arbeidsinntekt, sosial sikring og digitalisering for eit inkluderande framtidig arbeidsliv.

Målet er å leggje fram  ei ministererklæring som femner alle dei prioriterte temaene.

Sør-Afrika har invitert Noreg som eitt av åtte gjesteland under formannskapet sitt i G20 i år.

G20 er  eit sentralt internasjonalt forum for økonomisk samarbeid, der dei leiande og veksande økonomiane i verda årleg avstemmer strategiane sine på mange områder.

Noreg vil som gjesteland delta politisk og fagleg på arenaer og møteplassar som blir omfatta av G20-samarbeidet i 2025. Noreg var også gjesteland under Brasils leiing i 2024.

Arbeidsministermøtet i G20 finn stad i George i Sør-Afrika og startar 28.juli.