Ministrane vart samde om ein intensjon om å utvide det resultatbaserte samarbeidet utover Amazonas til også å omfatte den viktige savanneskogen Cerrado og andre skogtypar. Intensjonen er å bidra økonomisk til resultat på nasjonalt nivå så snart som mogleg, og seinast innan 2030, for å bidra til Brasils ambisiøse mål om å stanse avskoginga i heile landet innan 2030. Skogen og savannen i Cerrado er kjelde til det meste av vassføringa til Amazonas og ei svært viktig vasskjelde for Brasils landbruksproduksjon.

Brasil og Noreg vil intensivere felles innsats på fleire område, inkludert å støtte overgangen til avskogingsfrie verdikjeder for landbruksvarer som kjøtt og soya, støtte reformer av landbrukssubsidiar, verne rettane og levebrødet til urfolk og lokalsamfunn, nedkjempe internasjonal skogkriminalitet, framme skogrestaurering og sikre berekraftig forvaltning av Brasils nasjonalparkar og naturmangfald.

Vidare uttrykte Brasil og Noreg eit ønske om å styrkje det globale samarbeidet for å redusere tropisk avskoging og auke skogfinansiering. Dette inkluderer initiativ som det nyleg lanserte Tropical Forests Forever Facility (TFFF), resultatbasert klimafinansiering gjennom Amazonasfondet, høgintegritets karbonmarknader for REDD+, og dessutan innsats for å mobilisere privat kapital til berekraftig landbruk.