Noreg og Polen inngår partnarskap for energisikkerheit og grøn omstilling
Pressemelding | Dato: 21.05.2025 | Energidepartementet
Noreg og Polen har inngått ein strategisk partnarskap om energisikkerheit, grøn omstilling og sikring av kritisk energiinfrastruktur. Partnarskapen vart signert av energiminister Terje Aasland og den polske klima- og energiministeren Paulina Hennig-Kloska i Warszawa i dag.
– Samarbeidet byggjer på felles ambisjonar om å styrkje energisikkerheita i regionen, framskunde det grøne skiftet, arbeide mot klimanøytralitet og støtte grøn vekst i økonomiane våre – samtidig som me sikrar ei rettferdig omstilling, seier energiminister Terje Aasland.
Avtaleteksten er tilgjengeleg her:
Noreg er ein viktig leverandør av naturgass til Polen, medan polske investeringar på norsk sokkel styrkjer energisamarbeidet. I den strategiske partnarskapen forpliktar begge land seg til å støtte vidare eksport og investeringar i lågutsleppsløysingar.
Gjennom EØS-midlane og næringslivssamarbeid bidrar Noreg til den grøne omstillinga i Polen, medan polske selskap som jobbar med grøn teknologi kan spele ei rolle i Noregs energiomstilling. Begge land ser også potensial for vidare samarbeid innan fornybar energi, særleg havvind, sirkulær økonomi og karbonfangst og -lagring.
Noreg og Polen skal også dele erfaringar om sikring av energiinfrastruktur i Nordsjøen og Austersjøen.
Arbeidet med ein strategisk energipartnarskap mellom Noreg og Polen vart starta då Polens statsminister Donald Tusk besøkte Noreg i januar i år.
Her kan du lese innleiinga til statsministeren på pressekonferansen med Polens statsminister i januar: Statsministerens innledning på pressekonferanse med Polens statsminister - regjeringen.no.