Noreg skal leia forsvarsmateriellarbeidet i Ukraina
Nyheit | Dato: 25.08.2023 | Forsvarsdepartementet
I mars inngjekk Noreg ein avtale med Ukraina om å støtta utviklinga av ein ukrainsk forsvarsmateriellorganisasjon. No skal Noreg også leia arbeidet på strategisk nivå i NATO som koordinerer innsatsen med å utvikla forsvarsmateriellarbeidet mellom allierte nasjonar og Ukraina. Sektoren skal utviklast i retning av vestlege standardar og arbeidsformer.
NATO har sett i verk ein gjennomgang av kva alliansen kan bidra med innanfor forsvarsinnkjøp i Ukraina. Gjennomgangen skal vera ferdig i løpet av året og han skal munna ut i konkrete tiltak finansiert over eit av NATOs støttefond. Arbeidet Noreg skal koordinera i NATO og det bilaterale initiativet Noreg har sett i verk med den ukrainske forsvarsmateriellorganisasjonen skal blir koordinert.
Avtalen Noreg inngjekk med Ukraina i mars har vist seg interessant også for andre, og no har Storbritannia og Sverige også komme med i dette arbeidet.
- Det har vore store utfordringar med korrupsjon innan forsvarsinnkjøp i Ukraina. Heilt sidan NATO bad Noreg om hjelp i 2014, har me støtta Ukraina med å byggja inn integritet i lover, reglar og prosedyrar for gode forsvarsinnkjøp, seier forsvarsminister Bjørn Arild Gram.