– Mexico er ein viktig handelspartnar for Noreg, men handelsavtalen vår er 25 år gammal. Mykje har skjedd sidan han tok til å gjelde. Vi ønskjer ein moderne avtale som legg betre til rette for handel og norske bedrifter, seier utanriksminister Espen Barth Eide. 

Frihandelsavtalen mellom Mexico og EFTA-landa Noreg, Island, Liechtenstein og Sveits blei underteikna i 2000 og tok til å gjelde året etter. Arbeidet med å modernisere avtalen starta i 2016, men forhandlingane har lenge stått stille. No er EFTA-landa og Mexico einige om å ta opp att arbeidet. 

– Ein modernisert avtale vil styrkje samarbeidet vårt med Mexico, ein viktig utanrikspolitisk partnar for Noreg i Latin-Amerika. I ei tid der det internasjonale handelssystemet er under press, bidreg handelsavtalane til regelbasert økonomisk samkvem, som er bra for små og opne økonomiar som den norske, seier Eide.  

Dagens avtale gir mellom anna tollfridom for industrivarer og nesten alle norske sjømatprodukt. Ein modernisert avtale vil gi betre rammer for handel med tenester, investeringar og digital handel, og oppdaterte føresegner om miljø, berekraft og arbeidstakarrettar. 

Varehandelen mellom Noreg og Mexico var på om lag 7,3 milliardar kroner i 2025. Noreg eksporterte varer for 2,2 milliardar kroner og importerte for 5,1 milliardar. Gjødsel, sjømat, nikkel, maskiner og maskindelar er blant dei viktigaste varene Noreg eksporterer til Mexico.