– Vågan ligg i hjartet av Lofoten og er ein av stadane der mange har kjent effektane av fleire besøkande aller mest. Besøksbidraget skal bidra til at dei som besøker området også er med på å ta vare på verdiane dei kjem for å oppleve, seier næringsminister Cecilie Myrseth.

Dei tre første kommunane har no fått klarsignal til å innføre overnattingsavgift. Desse er Tromsø, Vågan og Stranda.

Vågan kommune opplever utfordringar som slitasje på natur, mangel på eller underkapasitet på infrastruktur som toalett, veg, parkering og avfall, og dessutan ei meirbelastning på lokalmiljø og offentlege tenester. Utvikling av eit regenerativt reiseliv står sterkt i kommunen og utviklinga av reiselivet skal støtte opp rundt lokal verdiskaping og ta vare på lokal kultur og naturressursar.

Besøksbidragslova vart vedteken av Stortinget i juni 2025, og lova og forskrift om overnatting til kommunane tredde i kraft 1. juli i år. Kommunar som ønsker å innføre besøksbidrag, må lage ein plan og utarbeide lokale forskrifter. Planen må godkjennast av Nærings- og fiskeridepartementet før den kommunale forskrifta kan tre i kraft.

Kommunar med særleg stor belastning frå reiselivet som har fått planen sin godkjent kan begynne å krevje inn overnattingsavgift frå tidlegast 1. januar 2027.

Departementet har også fått søknader om besøksbidrag frå Lyngen, Karlsøy, Vega, Bodø og Lofoten-kommunane som har levert ein samla plan frå Flakstad, Moskenes, Røst, Vågan, Vestvågøy og Værøy. Desse søknadene er til behandling.