Nye strategiar for å ta vare på historiske spor i bygd, by, næring og industri

– Dei historiske spora fortel om korleis samfunnet har utvikla seg, og kva som har forma bustader, industriar og næringar. Med dei nye bevaringsstrategiane legg vi til rette for at desse verdiane både blir tekne vare på og brukte aktivt i vidareutviklinga av samfunnet, seier klima- og miljøminister Andreas Bjelland Eriksen.

Kulturmiljø i bygd og by

Den nasjonale bevaringsstrategien for kulturmiljø i bygd og by skal bidra til at kulturmiljøverdiar blir tekne vare på i møte med endring, byutvikling, fortetting og demografiske skifte. Gjennom strategien for bygder og byar ønsker vi å løfte ulike typar kulturmiljø som tidlegare har fått mindre merksemd. Dette gjeld mellom anna gjenreisingsbyane, som utgjer ein viktig del av vår felles historie og som bumiljø rike på kulturhistoriske kvalitetar. Strategien er organisert i tre deltema:

• Identitet og særpreg
• Der vi møtest
• Der vi bur

• Les strategien: Bevaringsstrategi for kulturmiljø i bygd og by

Kulturmiljø i næring og industri

Den nasjonale bevaringsstrategien for kulturmiljø i næring og industri skal bidra til at sentrale delar av norsk nærings- og industrihistorie blir tekne vare på og brukte som ressurs for kunnskap, verdiskaping og berekraftig utvikling. Med strategien inkluderer vi no bevegelege kulturminne som har eit stort frivillig engasjement og gode kompetansemiljø knyta til seg. Rørlege kulturminne er ein sentral del av historia om utviklinga av infrastruktur og teknologi i Noreg. Også denne strategien er delt inn i tre deltema:

• Industrien som endrar samfunnet
• Dei mangfaldige næringane våre
• Logistikken i næring og industri

• Les strategien: Bevaringsstrategi for kulturmiljø i næring og industri

– Endeleg er alle dei nasjonale bevaringsstrategiane på plass. Kulturarven vår fortel oss om kven vi var og kven vi er, og Riksantikvaren er godt i gang med oppfølginga av strategiane for kystens kulturmiljø og landbrukets kulturmiljø. No gler vi oss til å følgje opp dei nye, i godt samarbeid med alle dei som er opptekne av kulturmiljøa våre, og det er mange, seier riksantikvar Hanna Geiran.