– Kommunar som vurderer samanslåing, treng føreseielege ordningar. Vi foreslår difor tre nye ordningar som støtter opp under lokale prosesser, utan krav til omfattande sakshandsaming og med minimale krav til søknad og rapportering, seier kommunal- og distriktsminister Bjørnar Skjæran.

Regjeringa slår saman dagens støtte til informasjon, innbyggarhøyring og utgreiing av samanslåing til eitt tilskot på éin million kroner per kommune.

Det blir i tillegg etablert ein standardisert modell for delvis kompensasjon av eingongskostnader. Tilskotet blir utbetalt automatisk etter at samanslåinga er vedteke.

Minstebeløpet er på 40 millionar kroner for to kommunar som slår seg saman. Beløpet aukar med talet på kommunar som inngår i samanslåinga, òg om den nye kommunen får meir enn 20 000 innbyggarar.

Kommunar som slår seg saman vil òg få eit standardisert oppstartstilskot, som blir utbetalt automatisk året før samanslåinga trer i kraft. Tilskotet aukar med talet på kommunar som inngår i samanslåinga, og dersom den nye kommunen får meir enn 20 000 innbyggarar.