Regjeringa gir 55 millionar kroner til opplæring på arbeidsstaden

Det skjer gjennom regjeringa si Kompetansepluss-ordning, som har som mål å hjelpe vaksne med låg formell utdanning. Ordninga skal bidra til å styrke grunnleggande ferdigheiter i lesing, skriving, rekning og digitale ferdigheiter, samt norsk og samisk.

– Nær 15 prosent av dei vaksne i Noreg har svake ferdigheiter i lesing og rekning, og arbeidstakarar med låg utdanning er ofte meir utsette ved omstilling. Difor er eg glad for at så mange verksemder ønsker opplæring på arbeidsplassen. Det vil styrke kompetansen til den enkelte og bidra til at vi får arbeidskrafta vi treng framover, seier forskings- og høgare utdanningsminister Sigrun Aasland (Ap).

Søkarar frå heile landet

Kompetansepluss består av fire ordningar med ein pott på til saman 117 millionar kroner (les meir  under).

No skjer tildelinga til ordninga Kompetansepluss arbeid. Direktoratet for høgare utdanning og kompetanse (HK-dir) forvaltar ordninga og har fått inn 189 søknader. Til saman blir det no delt ut 55,3 millionar kroner i støtte til verksemder i arbeidslivet.

Av desse går 8,7 millionar kroner til prosjekt i innsatssona i Finnmark og Nord-Troms, og 2,7 millionar kroner til samiske språkforvaltningskommunar (kommunar der norsk og samisk er likestilte språk).

Gjenstår å dele ut 30 millionar kroner

Frå før er det delt ut  31,8 millionar kroner til førehands­godkjende Kompetansepluss-tilbydarar som rammetilsegn i Kompetansepluss arbeid i januar.

I tillegg skal 30 millionar kroner fordelast i løpet av våren 2026 til ordningane Kompetansepluss frivilligheit (10 millionar kroner, fristen gjekk ut i februar) og Kompetansepluss fagopplæring (20 millionar kroner).

Den sistnemnde ordninga hadde søknadsfrist 5. mars. Målgruppa er vaksne arbeidstakarar med låg formell utdanning, men med lang erfaring i faget sitt. Opplæringa skal styrke grunnlaget for å kunne ta fagbrev som praksiskandidatar. Ho vil bidra til at dei som gjennomfører, står sterkare og kan få ei meir varig tilknyting til arbeidslivet.

Sidan Kompetansepluss starta opp i 2006, har over hundre tusen personar delteke i opplæring på arbeidsplassen.

– PIAAC-undersøkinga viser at mange vaksne framleis manglar grunnleggande ferdigheiter som er viktige for å stå trygt i arbeidslivet. Kompetansepluss gir deltakarane eit løft som både styrker meistring og opnar dører til vidare læring. At så mange søker også i år, viser tydeleg at behovet for slike tilbod framleis er stort, seier Sveinung Skule, direktør i HK-dir.

• Sjå verksemder som fekk pengar ved årets tildeling

Kompetansepluss arbeid 2026 – Fordeling av pengar etter opplæringsmottakarane (deltakarbedriftene) sitt fylke

Fylke	Tildelte midlar
Agder	2 234 833
Akershus	10 319 083
Buskerud	2 941 333
Finnmark	6 034 857
Innlandet	1 676 250
Møre og Romsdal	1 491 000
Nordland	2 681 833
Oslo	10 552 321
Rogaland	1 570 000
Telemark	0
Troms	3 429 000
Trøndelag	5 519 405
Vestfold	590 000
Vestland	3 967 500
Østfold	2 342 583