Utgiftene til båretransport har meir enn dobla seg på fire år, frå 187 millionar kroner i 2021 til 402 millionar kroner i 2025. Auken er større enn det som kan forklarast med generell prisvekst, fleire dødsfall og endra transportbehov.

– Buet vil med endringane ta ein litt større del av rekninga. Samtidig sørgjer vi for at dei som har minst å rutte med, kjem likt eller betre ut, seier arbeids- og inkluderingsminister Kjersti Stenseng.

Dette foreslår regjeringa

Den behovsprøvde gravferdsstønaden aukar med over 6 000 kroner, frå 30 898 til 37 000 kroner. Samtidig aukar eigendelen for båretransport frå 10 til 20 prosent av satsen for gravferdsstønad. Det betyr at eigendelen går opp frå 3 090 til 7 400 kroner.

Auken i den behovsprøvde gravferdsstønaden er dermed større enn auken i eigendelen ved båretransport. Dødsbu med lite eller ingen midlar vil difor kome likt eller betre ut enn i dag.

Endringane skal gjelde for dødsfall etter 31. desember 2026.

Sidan transport i samband med kremasjon blir dekt, får mange i sentrale strok også stønaden. Eigendelen er den same i heile landet, og dei som har lange transportavstandar, får dekt alle nødvendige transportutgifter utover eigendelen.

Heilskapeleg gjennomgang

Regelverket for stønad til båretransport har i hovudsak stått uendra dei siste tiåra, samtidig som utgiftene har auka kraftig. Arbeids- og inkluderingsdepartementet har difor starta ein heilskapleg gjennomgang av ordninga.

Målet er gode insentiv i gravferdsnæringa, effektiv ressursbruk og føreseielege utgifter både for etterlatne og for folketrygda.

– Vi meiner det er gode grunnar til å innføre desse justeringane no, sjølv om vi har eit heilskapleg arbeid på gang. Eventuelle større endringar vil kunne ta tid å gjennomføre, avsluttar Stenseng.