Regjeringa vil sikre raskare godkjenning av militære utdanningstilbod

Til saman har regjeringa prioritert 21 millionar kroner ekstra til NOKUT i 2025 for å få raskare behandling av søknader om akkreditering.

– Kompetanse og kunnskap er avgjerande i forsvaret av landet vårt. Då er det viktig at Forsvaret raskt kan utvikle nye utdanningstilbod. For å sikre rask saksbehandling og godkjenning vil vi no styrke kapasiteten i NOKUT til å akkreditere utdanningstilbod, spesielt retta mot utdanning i Forsvaret, seier forskings- og høgare utdanningsminister Sigrun Aasland (Ap).

NOKUT behandlar søknader om kva for utdanningstilbod som skal opprettast, i tråd med behova i samfunnet. Dei siste åra har talet på søknader og saksbehandlingstida auka. Éi av årsakene er at fagskulesektoren har vakse kraftig.

Langtidsplan for forsvarssektoren 2025-2036 legg stor vekt på kompetanse og utdanning som ein sentral del av styrkinga av Forsvaret. Langtidsplanen understrekar òg behovet for forskingsbasert utdanning.