Ryddar opp i reglane for grunnstønad

– Regjeringa ønskjer å rydde opp slik at stønadene samsvarar betre med meirutgiftene folk faktisk har, seier arbeids- og inkluderingsminister Kjersti Stenseng.

Grunnstønad er  kompensasjon for nødvendige ekstrautgifter som følgje av sjukdom eller liknande. For å få grunnstønad må desse ekstrautgiftene som hovudregel dokumenterast.

Frå 500 til 24 600 mottakarar

Sidan 2019 har personar med ADHD med hyperaktivitet fått kompensasjon for ekstrautgifter til klede, sengetøy og liknande som vert utsett for slitasje, utan å måtte dokumentere utgiftene. Før 2019 var det om lag 500 personar under 18 år som mottok grunnstønad for ADHD med hyperaktivitet. I juni 2026 hadde talet auka til 24 600.

– Det er tydeleg at endringa i 2019 ikkje har verka slik ein forventa då ho blei innført. Forenklinga med å fjerne dokumentasjonskravet står ikkje i eit rimeleg forhold til dei store kostnadene ho har ført med seg, seier Stenseng.

Fjernar unntaksregel

Regjeringa vil fjerne unntaksregelen om at denne gruppa ikkje treng å dokumentere ekstrautgiftene sine. Reglane blir dermed igjen dei same som for dei fleste andre som mottek grunnstønad.

For personar over 18 år blei det tilsvarande dokumentasjonskravet gjeninnført i 2023. Sidan då er det få nye personar over 18 år som har fått grunnstønad for ADHD med hyperaktivitet. Men dei som fekk stønaden innvilga før 2023, har i liten grad blitt bedne om å sende inn dokumentasjon. No foreslår regjeringa at også dei må sende inn dokumentasjon for å motta stønaden.

Endra sats ved cøliaki

Regjeringa har også vurdert nivået på stønaden til personar med cøliaki og foreslår at alle over 18 år med cøliaki framover får om lag 750 kroner i månaden i stønad. Dei som dokumenterer høgare meirutgifter, vil framleis kunne få høgare stønad. Stønaden for barn blir ikkje endra.

– Dei som treng grunnstønad og dokumenterer meirutgiftene, både når det gjeld ADHD og cøliaki, vil framleis få stønad på same nivå som før, seier statsråden.