– Helgeland er et område med etablerte industrimiljø og eit vesentleg kraftoverskot. Dette er eit bra utgangspunkt for både vidareutvikling av eksisterande industri og for nysatsingar. Det er gledeleg å kunne gi Statnett grønt lys til å vidareutvikle, melde og konsesjonssøkje tiltak som legg til rette for nærings- og industriutvikling på Helgeland, seier energiminister Terje Aasland.

Bakgrunnen for Statnett si utgreiing er dei mange planane om nytt og auka forbruk på Helgeland. Statnett anbefaler eit trinnvis konsept, som omfattar både spenningsoppgraderingar av eksisterande leidningar til 420 kV, og etablering av nye 420 kV-leidningar.

I tillegg til å leggje til rette for forbruksvekst kan konseptet også leggje til rette for tilknyting av ny kraftproduksjon og gi kapasitet til auka kraftflyt inn og ut av regionen. Departementet peikar på at det er ein styrke ved det anbefalte konseptet at det er fleksibelt og kan tilpassast behovsutviklinga. På bakgrunn av dette sluttar Energidepartementet seg til Statnett sitt konseptval.

Fråsegna frå Energidepartementet er eit ledd i den overordna planprosessen, og inneber ikkje ei godkjenning av konkrete prosjekt. Detaljane i tiltaka vil bli vurdert nærare i den vidare planlegginga og i konsesjonsbehandlinga.

Fråsegna i PDF-format: