Revidert nasjonalbudsjett

Fleire kommunar skal få skulemiljøteam

Pressemelding | Dato: 15.05.2025 | Kunnskapsdepartementet

Arbeidarparti-regjeringa foreslår å auke tilskota til skulemiljøteam med 10 millionar kroner slik at endå fleire kommunar kan bli med i ordninga. Auken som regjeringa no foreslår, inneber at 55 millionar kroner vil gå til kommunale skulemiljøteam i 2025.

– I år har regjeringa meir en tredobla midlane til arbeidet med betre skulemiljø. Vi veit at dårleg skulemiljø går utover både læring og trivsel. No vil enda fleire skular få hjelp til å handtere vanskelege skulemiljøsaker, men også hjelp til å jobbe førebyggande, seier kunnskapsminister Kari Nessa Nordtun (Ap).

I 2024 oppretta regjeringa ei ordning slik at kommunar kan søke om tilskot til å etablere eller styrke kommunale skulemiljøteam. Skulemiljøteama skal gi ekstra tett oppfølging og sikre raskare og betre innsats til skular som har særlege utfordringar med skulemiljøet og bidra til å førebygge mobbing. Skulemiljøteam kan òg ha barnehagar som målgruppe, slik at det forebyggande arbeidet kan starte allereie der.

– Regjeringa tek utfordringane med skulemiljø på alvor. Å sikre elevane eit trygt og godt skulemiljø er ein av dei grunnleggande oppgåvene til skulen. Likevel veit vi at mange skular står i utfordringar som det er krevjande å løyse åleine, seier Nordtun.

Stor interesse for skulemiljøteam

I 2024 søkte 123 kommunar om tilskot til skulemiljøteam og 23 kommunar fekk midlar. I år er det 168 kommunar som har søkt. Utdanningsdirektoratet har enno ikkje ferdigbehandla desse søknadene.

– Dette tyder på at regjeringa har treft eit behov i skulen. Regjeringa har sett i gang ei rekke tiltak for betre skulemiljø. Skulemiljøteam handlar om å styrke kompetansen og støtta til skular med skulemiljøutfordringar og sikre at elevane får det betre, seier Nordtun.

Regjeringa sine tiltak for betre barnehage- og skulemiljø

Regjeringa har prioritert midlar til ei tilskotsordning slik at kommunar kan opprette skulemiljøteam. I 2025 er denne ordninga styrka frå 15 millionar til 55 millionar kroner.
Regjeringa har varsla ei ny skulemiljøundersøking med mål om å gi skular og kommunar betre informasjon om skulemiljøet, og ein strategi for betre barnehage- og skulemiljø som skal gi betre oversikt og støtte i arbeidet.
I ny opplæringslov er det gjort fleire justeringar for å klargjere korleis reglane om skulemiljø skal forståast og praktiserast. Det er også gjort tydeleg i opplæringslova at tilsette kan gripe inn fysisk i situasjonar når det må til for å hindre skade på elevar, tilsette eller skulen. Regjeringa har også fremja lovforslag til Stortinget om å utvide tilgangen til å gripe inn fysisk der ein elev krenker ein person psykisk eller vesentleg forstyrrar opplæringa til andre elevar.
Vi veit at mobilen kan brukast til mobbing. Regjeringa har kome med mobiltilrådingar i skulen og no har nesten alle grunnskular innført restriksjonar på mobilbruk.
Regjeringa har utvida læringsmiljøprosjektet slik at fleire barnehagar og skular kan få hjelp og støtte. Læringsmiljøprosjektet er ei ordning der dei som slit med barnehage- og skulemiljøet kan få støtte og rettleiing av fagfolk over tid.
Regjeringa har lansert ein tiltakspakke som skal styrke arbeidet til skulen med førebygging og oppfølging av urovekkande skulefråvær, som ein del av stortingsmeldinga «Ein meir praktisk skule».