– Folketrygdlova er omfattande og komplisert, og Nav bruker store ressursar på å tolke regelverket. Derfor set vi no ned eit utval som skal gå gjennom lova og føreslå endringar. For å få eit Nav som gjer ein enda betre og meir effektiv jobb, treng vi eit lovverk som hjelper til og bidreg til at folk får riktige og raske vedtak, seier arbeids- og inkluderingsminister Kjersti Stenseng.

Den no gjeldande folketrygdlova blei vedteken i 1997. Nå set regjeringa ned eit utval som skal revidere ho. Lagdommar Torunn Elise Kvisberg vil leie utvalet, som skal levere utredninga si innan 31. desember 2027. Utvalet  har fått i oppdrag å kome med forslag til endringar i lovverket som skal gjere det enklare å forstå og meir tilpassa  dei digitale løysingane som fins.  

– Mykje av det Nav gjer fungerer bra, men mykje må bli betre. Ei viktig årsak til at sakshandsamingstidene på ein del område er for lange, er at lovverket i dag er komplisert. Det gjer at det heller ikkje er godt nok eigna for automatisering og digitalisering. Dette er negativt for det viktige arbeidet til Nav med å hjelpe folk som treng det. Regelverket må bli enklare, seier Stenseng.

Utvalet har fått omfattande oppgåver. Det skal utarbeide forslag til eit lovverk som i større grad oppfyller de følgjande måla:

  • leggje til rette for masseforvaltning, digitalisering og heil-/delautomatisert sakshandsaming
  • sikre god samanheng med reglane i den nye forvaltningslova
  • sørgje for at forvaltningspraksis blir nedfelt i lov eller forskrift i den grad det er nødvendig eller hensiktsmessig
  • forbetre og eventuelt forenkle strukturen i lovverket
  • oppnå eit lovverk som er føremålstenleg utforma i lys av Noregs forpliktingar etter EØS-avtalen
  • sikre eit føremålstenleg grensesnitt mellom lov og forskrift
  • sikre klarspråk og eit godt lovspråk  

Arbeids- og inkluderingsdepartementet vil opprette ei referansegruppe som skal støtte utvalet med innspel.  

– Dette er eit stort og viktig oppdrag. Folketrygdlova er ei svært viktig lov som vedkjem oss alle i ulike periodar i livet. Eg er glad for å ha fått høve til å leie dette lovarbeidet. Eg ser fram til å kome i gang med arbeidet i utvalet, seier utvalsleiar Kvisberg. 

Utvalet har denne samansetninga:

  • Lagdommar Torunn Elise Kvisberg, Lillehammer (leiar)
  • Advokat Hilde Kristin Ellingsen, Oslo
  • Instituttleiar Hanne Glemmestad, Gjøvik
  • Seniorrådgjevar Marianne Hansen, Steigen
  • Tingrettsdommar Daniel Løstegaard Olsen, Trondheim
  • Regiondirektør Kristin Røymo, Tromsø
  • Fastlege Aleksander Notto Sandnes, Kristiansand
  • Avdelingsdirektør Arnulf Tverberg, Asker
  • Adjunkt Johan Næser, Århus, Danmark