Utanriksministeren i Brussel:
Vil styrkje EØS-arbeidet for å ta vare på norske interesser
Nyheit | Dato: 18.11.2026 | Utanriksdepartementet
På EØS-rådsmøtet i Brussel tysdag 17. november tok utanriksminister Espen Barth Eide opp grepa regjeringa tek for å styrkje og fornye Noregs EØS-arbeid. Kor viktig det er at Noreg blir ein del av europeiske preferansekriterium, var òg tema på møtet.
– Vi lever i ei farlegare verd der samarbeidet med Europa og EU blir viktigare for Noreg. Vi må ta betre vare på EØS-avtalen. Derfor endrar vi no måten vi jobbar med EU- og EØS-saker på. I dag startar arbeidet med mange EØS-saker først etter at regelverket er vedteke i EU. Då er døra for å påverke i realiteten lukka. Dette bidreg òg til unødvendig etterslep som er ei ulempe for norsk næringsliv, seier utanriksminister Espen Barth Eide.
Regjeringa la i september fram dei største endringane sidan 1994 i Noregs EØS-arbeid. Arbeidet som starta i fjor, går framleis føre seg, og målet er å kome tidlegare på, prioritere tydelegare og bruke ressursane betre.
– Eg opplever at initiativa våre for å redusere etterslepet blei godt mottekne i Brussel, seier Eide.
Like vilkår i den indre marknaden
EU utviklar i høgt tempo ny politikk for å styrkje europeisk konkurranseevne og økonomisk tryggleik, og mykje av dette skjer utanfor verkeområdet til EØS-avtalen. Til dømes utarbeider EU preferansekriterium, som «Made in Europe», der utforminga har noko å seie for om norske bedrifter kan konkurrere på like vilkår.
– Det er bra for Noreg at EU styrkjer europeisk konkurranseevne og økonomisk tryggleik. Økonomiane og verdikjedene våre er tett samanvevde, og vi står overfor mange av dei same globale utfordringane. Vi er derfor opptekne av at nye tiltak for å verne europeisk industri, som europeiske preferansekriterium, må omfatte heile EØS, seier utanriksminister Eide.
Noreg, Island og Liechtenstein deltek fullt ut i den indre marknaden, men står utanfor EUs felles handelspolitikk og tollunion.
– Når EU set i verk tiltak for å verne den felles marknaden vår, som svar på den meir krevjande geopolitiske situasjonen, kan det skape handelspolitiske utfordringar og dilemma for oss. Desse er regjeringa oppteken av å løyse i fellesskap med EU, seier Eide.
I Brussel hadde utanriksministeren eigne møte der han tok opp dette med handelskommissær Maroš Šefčovič og Thomas Byrne, statssekretæren for europeiske saker og forsvar i Irland. Irland har formannskapen i EU-rådet dette halvåret.
Om EØS-avtalen
Gjennom EØS-avtalen deltek Noreg i EUs indre marknad. Avtalen gir oss retten til fri rørsle for personar, varer, tenester og kapital. Dermed har nordmenn dei same rettane som EU-borgarar når det gjeld handel med varer og tenester og rett til å arbeide, studere og bu i andre EØS-land.
Om EØS-rådet
EØS-rådet er det øvste samarbeidsorganet mellom EU og dei tre EØS/EFTA-landa. Rådet består av representantar frå EUs organ og utanriksministrane frå Noreg, Liechtenstein og Island. Rådet møtest to gonger i året, i mai og november, for å diskutere aktuelle saker i EØS-samarbeidet. Møtet er todelt med ein uformell politisk dialog og det formelle EØS-rådsmøtet. Møtet som fann stad i Brussel 17. november, var det 63. møtet i EØS-rådet.