Enklare konsesjonsprosessar for stor vasskraft og kraftleidningar
Pressemelding | Dato: 29.08.2025 | Energidepartementet
Det er i statsråd i dag fastsett endringar i konsesjonsbehandlinga av nye, store kraftleidningar og store vasskraftanlegg. Målet med endringane er å forenkle og effektivisere konsesjonsbehandlinga.
Endringane medfører at det framover er Noregs vassdrags- og energidirektorat (NVE) som skal avgjere konsesjonssøknadar og Energidepartementet som skal vere klageinstans. For store kraftleidningar blir òg kravet om ekstern kvalitetssikring og myndigheitsbehandling av konseptvalutgreiingar (KVU) avvikla.
– Dette er forenklingar som skal bidra til å styrkje konkurransekrafta vår. Noreg treng meir kraft og kapasitet i straumnettet. Mange bedrifter ventar på ledig kapasitet for å kunne behalde dagens arbeidsplassar, skape nye jobbar, skape verdiar og kutte utslepp. Prosessane skal vere grundige, men me må unngå dobbeltbehandling i direktorat og departement, seier energiminister Terje Aasland.
Dagens konsesjonsbehandling og vilkårsrevisjon er omfattande. Store kraftleidningar og store vasskraftanlegg, i tillegg til mindre vasskraftanlegg som har regulering eller overføringar, blir først behandla av NVE som sender innstilling til Energidepartementet. Energidepartementet gjer så ei sjølvstendig vurdering, før eventuell konsesjon eller vilkårsrevisjon blir vedtatt av Kongen i statsråd. Tersklane i regelverket for vasskraft gjer at også små saker må behandlast i fleire instansar, noko som gir lang saksbehandlingstid. Endringane vil innebere både ei forenkling og effektivisering.
– Me har allereie tatt fleire grep for raskare kraft- og nettutvikling. Me ser at dette har fungert, men me må gjere meir. Derfor innfører me no endringar i konsesjonsbehandlinga for store kraftleidningar og stor vasskraft. Resultatet er enklare prosessar og mindre byråkrati, seier Aasland.
Avvikling av KVU-ordninga inneber at det ikkje lenger er krav til ekstern kvalitetssikring og myndigheitsbehandling av utreiingar for nye, store kraftleidningar med spenning over 300 kV og lengde på minst 20 km. Dette er tidkrevjande prosessar som i dag må gjerast før melding eller konsesjonssøknad.
Kongens myndigheit til å gi eller avslå konsesjon til større vasskraftanlegg blir no delegert til Energidepartementet. Departementet har i eige vedtak delegert myndigheita vidare til NVE. NVE er i dag konsesjonsmyndigheit når det gjeld vindkraft, solkraft og mindre kraftleidningar. Den nye ordninga sikrar likebehandling av de ulike teknologiane.
Dette er eit viktig grep i arbeidet med å redusere saksbehandlingstida. Som klageinstans kan Energidepartementet i større grad konsentrere seg om klagegrunnane framfor heile sakskomplekset. I tillegg kan Statnett og kraftprodusentar i fleire saker kome tidlegare i gang med grunnerverv og detaljprosjektering.