– Vi må få fart på omstillinga av norske verksemder med bruk av kunstig intelligens. Vi må samarbeide og lære av kvarandre for å styrke norsk konkurransekraft samtidig som vi sikrar at offentleg sektor gir god rettleiing. Her vil KI Noreg ha eit viktig ansvar , seier digitaliserings- og forvaltningsminister Karianne Tung (Ap).

KI Noreg skal etablerast i Digitaliseringsdirektoratet (Digdir) og skal bli ein nasjonal arena for innovativ og ansvarleg utvikling og bruk av KI i norske verksemder. Det er  foreslått at Digdir får ti millionar kroner til denne etableringa.

Lovpålagte oppgåver

Regjeringa vil fremje forslag til ny lov om kunstig intelligens for Stortinget våren 2026. Lova gjennomfører EUs KI-forordning i norsk rett, og hovuddelen er planlagt å tre i kraft samtidig som i resten av EU i august 2026. Målet er sikre like konkurransevilkår for norske aktørar på den europeiske marknaden.

Regjeringa foreslår samtidig å løyve 20 millionar kroner til Nasjonal kommunikasjonsmyndigheit (Nkom), Datatilsynet og Digdir for å ivareta nye lovpålagte oppgåver knytt til KI-lova.

Ei slik oppgåve er å opprette ei regulatorisk KI-sandkasse - eit testmiljø der norske  aktørar kan få hjelp til å prøve ut om nye KI- løysingar er i tråd med regelverket. Digdir, Nkom og Datatilsynet skal samarbeide om den regulatoriske sandkassa som plasserast i KI Noreg.

Nkom får midlar til oppgåva som nasjonal koordinerande tilsynsmyndigheit etter ny KI-lov, og skal sørgje for at KI-reglane blir praktiserte  og tolka likt  i Noreg. Nkom skal òg vere nasjonalt kontaktpunkt opp mot  EU.

– Forslag til KI-lov har vært på høyring. Med denne lova tar Noreg eit viktig steg for å sikre norske aktørar like konkurransevilkår som resten av Europa. Vi tar sikte på at lova skal gjelde frå sommaren 2026, seier Tung.

Norsk akkreditering får midlar til oppgåva som nasjonalt akkrediteringsorgan etter ny KI-lov.

Digitaliserings- og forvaltningsdepartementet sin pressetelefon: 22 24 20 00

E-post til kommunikasjonseininga: presse@dfd.dep.no