– Det er svært gledeleg at Fram-området blir vidareutvikla. Bruk av eksisterande infrastruktur gjer denne fellesutbygginga av fleire funn lønnsam. Utbygginga gir oppdrag til norsk leverandørindustri, skaper store verdiar for fellesskapet og forsyner Europa med energi dei sårt treng, seier energiminister Terje Aasland.

Fram Sør består av fleire olje- og gassfunn i den nordlege delen av Nordsjøen og 20 km unna Troll C-plattforma. Utbygginga betyr ei utviding av Framfeltet og bidreg til auka utvinning.

Rettshavarane skal byggje ut Fram Sør med fire nye havbotnrammer som blir knytte til den eksisterande infrastrukturen på Framfeltet og inn til Troll C-plattforma.

Planlagd produksjonsstart for fram Sør er mot slutten av 2029. Forventa utvinnbare ressursar er berekna til om lag 116 millionar fat oljeekvivalentar. Totale investeringar for den samla utbygginga er rekna til om lag 21 milliardar kroner.

Equinor Energy AS er operatør for Fram Sør (45 prosent). Dei andre rettshavarane er Vår Energi ASA (40 prosent) og INPEX Idemitsu Norge AS (15 prosent).

Bakgrunn

Fram-feltet vart påvist i 1990 og sett i produksjon i 2003. Feltet ligg om lag 20 km nord for Troll. Fram Sør består av fleire olje- og gassfunn som vart påvist i perioden 2014-2021.

Utbyggingsløysinga er fire nye havbotnrammer som blir knytte tilbake til Troll C-plattforma for prosessering og eksport. Planlagd oppstart er mot slutten av 2029. Forventa utvinnbare ressursar er berekna til om lag 116 millionar fat oljeekvivalentar.

Rettshavarane anslår at om lag 51 prosent av investeringane i prosjektet vil gå til norske leverandørar. Totale sysselsetjingsverknader er berekna til rundt 4500 årsverk gjennom utbyggingsperioden.

Godkjenningsbrevet kan du lese her: Godkjenning av plan for utbygging og drift av Fram Sør.