Med dette har regjeringa lagt til rette for totalt 2 900 nye studieplassar ved fagskulane sidan 2021.

– Skal Noreg halde fram å vere gode på innovasjon og grøn omstilling, må fleire ta høgare yrkesfagleg utdanning. Fagskulane leverer kompetanse som næringslivet etterspør, og gjer det mogleg å kvalifisere seg til eit arbeidsliv som stadig endrar seg, seier forskings- og høgare utdanningsminister Sigrun Aasland (Ap).

Prioriterer blant anna helse og beredskap

Regjeringa vil at visse fagområde blir prioriterte i fordelinga av midlar til dei nye studieplassane. Dei prioriterte områda er tekniske fag, helse- og velferdsfag og utdanningar som støttar det grøne skiftet. I tillegg skal tilbod som gir kompetanse til forsvar og sivil beredskap prioriterast.

Vil styrke kvalitetssikring i høgare yrkesfagleg utdanning

Som del av satsinga på nye studieplassar i høgare yrkesfagleg utdanning foreslår regjeringa å løyve 15 millionar kroner til Nasjonalt organ for kvalitet i utdanninga (NOKUT). Pengane skal gå til meir tilsyn og fleire akkrediteringar i høgare yrkesfagleg utdanning.

Om fagskular

  • Aldri før har så mange elever begynt på yrkesfag. For mange av desse er fagskulen neste steg for vidareutdanning og fagleg påfyll gjennom heile yrkeslivet.
  • Fagskulane tilbyr praksisnære utdanningar som er tett kopla til arbeidslivet.
  • Sju av ti fagskulestudentar studerer på deltid. Fleksible utdanningsløp og varierande lengd gjer det mogleg å kombinere utdanninga med jobb og familie.