Ringverknadsanalysen tek føre seg betydinga landbruket har for sysselsetjing, verdiskaping og busetjing i heile landet og talfestar ringverknadene av landbruksproduksjon. Undersøkinga stadfestar at landbruket har relativt stor betyding i dei minst sentrale kommunane, der landbruket utgjer heile 12 prosent av den private sysselsetjinga.

– Rapporten synleggjer landbrukets betydning som næring, og resultata underbyggjer betydinga av det landbrukspolitiske målet om å oppretthalde landbruk i heile landet, seier landbruks- og matminister Nils Kristen Sandtrøen.

Landbruket spelar ei viktig rolle for den norske distriktsøkonomien. I 2023 hadde det ei verdiskaping (inkludert tilskot) på i underkant av 50 milliardar kroner. 30 milliardar kroner var direkte verdiskaping frå landbruket, medan innkjøp av varer og tenester i næringa la grunnlag for 19 milliardar kroner i verdiskaping i andre næringar.

Landbruket sysselsette i underkant av 65 000 årsverk i 2023, 49 000 av dei i landbruket og 15 000 hos leverandørar til landbruket.

Innlandet er det største landbruksfylket, og i 2023 var den samla verdiskapinga frå landbruksnæringa 6,5 milliardar kroner. I det nest største landbruksfylket Trøndelag og det tredje største landbruksfylket Rogaland var den samla verdiskapinga frå landbruksnæringa høvesvis 4,3 milliardar og 4,6 milliardar kroner.

Industri og foredling inngår ikkje i ringverknadsutrekningane, men er omtala separat.

I denne rapporten, forstår ein ringverknad som avgrensa til det oppstraums økonomiske fotavtrykket. Det vil seia leverandørledd utanfor primærnæringa sjølv. Nedstraumsaktivitet, som matindustri og foredling, er ikkje med i ringverknadsutrekningane. Dei vert omtala separat for å vise heilskapen i næringskjeda.

Når det gjeld norsk næringsmiddelindustri, foredlar ein meir enn berre jordbruksråvarer, sjølv om desse er føresetnadene for delar av verdikjeda. Ifølgje tal frå SSB, kjøper mat- og drikkevareindustrien 92 prosent av varene frå jordbruket, medan lêrindustrien kjøper 0,5 prosent. Verdiskapinga i den landbruksrelaterte næringsmiddelindustrien auka frå 22 milliardar kroner i 2009 til 35 milliardar i 2023, som svarar til ein vekst på i underkant av 60 prosent.

I rapporten ser ein også på konsekvensane av at landbruksnæringa endrar seg. Der landbruket utgjer en stor andel av verdiskapinga, kan redusert aktivitet få konsekvensar for inntekta i verdiskaping og hushald på gunn av fråvær av annan næringsaktivitet. Dette kan føre til konsekvensar for forbruk, tenestetilbod og busetjing.

Menon Economics og Agri Analyse har på oppdrag frå Landbruks- og matdepartementet og Kommunal- og distriktsdepartementet gjennomført analysen av ringverknadene av landbruksbasert næring i Noreg. Han omfattar mellom anna jordbruk, skogbruk og reindrift, og han kartlegg direkte og indirekte bidrag til sysselsetjing, verdiskaping og geografisk fordeling av økonomisk aktivitet.