– Endringane vi no gjer i genteknologilova skal gjere det enklare å drive forsking og utvikle genteknologi, samtidig som regelverket framleis sikrar trygg bruk. Dette er ei positiv utvikling, seier klima- og miljøminister Andreas Bjelland Eriksen.

Endringane i regelverket inkluderer mellom anna at GMO-legemiddel til menneske no kan bli godkjende utan at ein treng å vurdere berekraft, samfunnsnytte og etikk. Desse omsyna er allereie varetekne gjennom andre regelverk for legemiddel. Det same gjeld for bruk av GMO i forsking.

Krava til helse- og miljørisikovurdering blir også tydelegare og i nokre tilfelle mindre omfattande. I tillegg kan produkt som dekkjer eit stort og udekt behov få mellombels godkjenning, sjølv om all dokumentasjon ikkje er på plass. Ny kunnskap må då bli ettersend.

Forskrifta om konsekvensutgreiing etter genteknologilova er også oppdatert. Mellom anna er søknadsprosessen for klinisk utprøving av GMO-legemiddel forenkla.

Endringane vil gjere det enklare å drive forsking og innovasjon på genteknologi, men framleis innanfor trygge rammer. Fleire av forslaga byggjer på tilrådingar frå heile eller delar av genteknologiutvalet. Utvalet overleverte utgreiinga si i 2023.

Genteknologi er omfatta av EØS-avtalen, og endringane som no trer i kraft er i samsvar med EØS-reglane.