Regjeringa gir 142 millionar til bransjeprogram

– Bransjeprogramma er viktige for konkurransekrafta og omstillingsevna til norsk arbeidsliv. Med denne satsinga får dei tilsette viktig fagleg påfyll, og arbeidslivet  får kompetansen dei treng framover, seier forskings- og høgare utdanningsminister Sigrun Aasland (Ap).

Spleiselag for omstilling og kompetanse

Bransjeprogram er ei tilskotsordning der staten og partane i arbeidslivet samarbeider om å auke deltakinga i kompetanseutvikling innanfor utvalde bransjar.

Målet er at tilsette, permitterte og ledige i bransjar med særleg behov for endring får nødvendig kompetanse til å meistre nye oppgåver, og dermed blir i jobben. Dei tilsette kan få korte og relevante etter- og vidareutdanningar.

Desse bransjane får pengar til utdanningstilbod i 2026:

Bransje	Tal på prosjekt	Totalsum
Industri- og byggenæringa	27	Kr           30 084 426
Helse- og omsorgstenestene	20	Kr           28 596 993
Barnehagesektoren	29	kr           37 345 459

I tillegg kan det fordelast rundt 46 millionar til bransjeprogram for SFO-sektoren.

• Les kva prosjekt som får tilskot

To nye bransjeprogram i 2026

I samband med Stortingets behandling av revidert nasjonalbudsjett 2025 vart det vedteke å opprette eit nytt bransjeprogram for tilsette i barnehagesektoren. Formålet er å gi tilsette tilgang på etter- og vidareutdanning i sektoren, sikre høg kvalitet i tenestene og møte dei spesifikke behova til barnehagebarn.

I samband med budsjettsemja om 2026-budsjettet vart det vedteke et nytt bransjeprogram for tilsette i SFO for å auke kvaliteten.

– Eigne bransjeprogram for skolefritidsordningane og barnehagesektoren vil gi endå meir målretta etter- og vidareutdanningar. Det vil bidra til fleire fagleg trygge tilsette, styrka kvalitet i tilboda, og gode kvardagar for dei minste, seier Aasland.

Mange søknader

Direktoratet for høgare utdanning og kompetanse (HK-dir), som forvaltar ordninga, mottok totalt 167 søknader i år. Det er ein auke på rundt 20 prosent frå i fjor, då det kom inn 140 søknader.

– Bransjeprogrammet treffer kompetansebehovet i arbeidslivet. Når tilboda blir utvikla i tett samarbeid med partane i arbeidslivet, får vi korte og fleksible utdanningar som er relevante for både verksemder og tilsette, seier Sveinung Skule, direktør i HK-dir.