Regjeringa gir pengar til 900 nye studieplassar i fagskulane

– Fagskulane sikrar etterspurd kompetanse i heile Noreg. Arbeiderpartiregjeringa held fram satsinga på fagskulane, og neste år styrker vi kapasiteten med 900 nye studieplassar i heile landet. Slik bygger vi framtids-Noreg, seier forskings- og høgare utdanningsminister Sigrun Aasland (Ap).

Fagskular tilbyr yrkesretta utdanningar som ofte kan kombinerast med jobb. I NHOs kompetansebarometer for 2024 melde 68 prosent av bedriftene at dei har behov for folk med høgare yrkesfagleg utdanning.

Oslo, Rogaland og Innlandet får flest studieplassar

Det er Direktoratet for høgare utdanning og kompetanse (HK-dir) som har fordelt midlane til fylkeskommunane. HK-dir har lagt stor vekt på fylkeskommunane sine eigne vurderingar av behov for vekst i høgare yrkesfagleg utdanning.

No er det opp til fylkeskommunane å bestemme korleis midlane skal bli fordelte til fagskulane. I fordelinga av dei nye studieplassane skal fylkeskommunane prioritere:

• tekniske fag
• helse- og velferdsfag
• fag som er særleg viktige for det grøne skiftet
• utdanningar som styrker forsvar og sivil beredskap

– Fylkeskommunane kjenner dei regionale behova best. Ved å gi dei handlingsrom i fordelinga til fagskulane, styrker vi rolla deira som kompetansepolitisk aktør, og legg til rette for treffsikre utdanningstilbod, seier direktør i HK-dir, Sveinung Skule.