Regjeringa vil tillata sjukmelding etter e-konsultasjon

– E-konsultasjon er effektivt og fleksibelt for både pasientar og fastlegar. No kan pasientar som legen allereie kjenner godt sleppa å reisa til eit legekontor, noko som kan opplevast som ei unødig byrde når ein er sjuk, seier arbeids- og inkluderingsminister Marte Mjøs Persen.

Dei siste to åra har bruken av e-konsultasjon i helsetenestene auka. Under pandemien vart det mellombels opna for at også sjukmelding kan givast utan personleg oppmøte hos legen.

– Både NAV og helsetenestene har gitt uttrykk for positive erfaringar med e-konsultasjon, som kan gjerast over telefon, video eller skriftleg kontakt. Derfor vil me gjera ordninga permanent, seier Mjøs Persen.

Pasienten må vera kjend for legen

For å avgrensa risikoen for at sjukmelding blir gitt på feil grunnlag er det i lovproposisjonen som no blir sendt Stortinget sett opp fire vilkår:

• Pasienten er kjend for legen.
• Diagnosen til pasienten er kjend for legen.
• Legen kan vurdera arbeidsevna til pasienten utan fysisk undersøking.
• Legen reknar at det er fagleg forsvarleg å gjennomføra konsultasjonen som ein e-konsultasjon.

I tillegg blir eit særleg unntak foreslått knytt til fare for smitte med allmennfarleg smittsam sjukdom ved fysisk oppmøte.

– Dette vil gjera det enklare ved forlengingar og ved komplikasjonar for dei med kroniske lidingar, seier Mjøs Persen.

Rene nettbaserte helsetenester vil ikkje kunna skriva sjukmelding, fordi det i kravet om at pasienten skal vera kjent for legen ligg ein føresetnad om at pasienten tidlegare har vore til fysisk konsultasjon.