– Eg har lagt vekt på stabilitet og føreseielege rammer i årets reguleringar, i ei tid der torskekvoten er redusert betydeleg over fleire år. For å hindre uttak av småfisk blir felt for seinotfiske førehandstengde, og vi vidarefører òg tiltak for å verne hyse og torsk under minstemål. God etterleving av regelverket er avgjerande for ei berekraftig forvaltning, seier fiskeri- og havminister Marianne Sivertsen Næss.

Totalkvoten for torsk i 2026 er på 285 000 tonn, ein nedgang på 16 prosent. Av dette er norsk kvote 139 827 tonn.

Totalkvoten for hyse er på 153 293 tonn, ein auke på 18 prosent. Av dette er norsk kvote 76 345 tonn.

Nærings- og fiskeridepartementet har fastsett seikvoten til 164 149 tonn for 2026, i tråd med forvaltningsregelen. Fiskeriforhandlingane med andre land er enno ikkje avslutta, men det er lagt til grunn kvotebytte med andre land på nivå med inneverande år. Norsk kvote utgjer 150 399 tonn etter førebelse avsetningar til andre land.

I tråd med vanleg praksis blir det fastsett mellombelse fartøykvotar (90 prosent av kvotene) for å ta høgde for kvotefleksibilitetsordninga. Endelege kvotar blir fastsette når kvotefleksibilitetsoppgjeret er klart i månadsskiftet januar/februar.

For sei ligg det an til å bli ei betydeleg overføring til 2026 som følgje av låg utnytting i år.

I 2026 blir felt for seinotfiske førehandstengde, og det vil bli kravd både lengdemåling, prøvefiske og rapportering av resultata til styresmaktene. Dette reduserer risikoen for eit for høgt uttak av små fisk. Fiskeridirektoratet vil i dialog med næringa avklare gjennomføringa av dette før seinotfisket startar.

På våren har kystområda i Aust-Finnmark i ei årrekkje hatt store innslag av lita hyse, og dei siste åra også aukande førekomstar av liten torsk. Ofte er ein stor del av fisken så småvaksen at samansetjinga på felta ligg under minstemålskriteria.

Utfordringane med særleg hyse, men også sei under minstemål, er venta å halde fram neste år. Difor vil eit område mellom Kinnarodden og Svartnes lykt i Aust-Finnmark også i 2026 vere stengt for snurrevadfiske frå 1. april til og med 15. juni for å verne fisk under minstemål. Området kan opnast tidlegare dersom kontrollar viser at storleikssamansetjinga er tilfredsstillande. God etterleving av minstemålsreglane bidreg til ei meir berekraftig forvaltning av bestandane.

Avsetningar

Ordninga med kvotebonus for levandelagring av torsk blir vidareført med ei avsetning på 500 tonn torsk. Ferskfiskordninga for fartøy som fiskar med konvensjonelle reiskapar blir vidareført i 2026 med 76 085 tonn i lukka gruppe og 865 tonn i open gruppe. Det er ein nedgang på 10 prosent samanlikna med 2025. Fisk som er nedklassa og registrert med kvalitet skadd/vrak på landings- og sluttseddel er ekskludert frå berekningsgrunnlaget. I tillegg all fangst av blåsteinbit, skate, og hyse under 800 gram rund vekt. Ordninga gjeld frå 29. juni med ein kvotebonus på 20 prosent på vekebasis.

Levendelagring av torsk og ferskfiskordninga skal bidra til at industrien i større grad får tilgang til fersk fisk utanom hovudsesongen i torskefisket.

Open gruppe

Det blir sett av 3 000 tonn norsk kvote til kystfiskeordninga med eit garantert kvotetillegg på 3,5 tonn. Yngre fiskarar vil få eit kvotetillegg på 2 tonn. Alderstillegget gjeld for kvinner til og med 40 år og menn til og med 30 år.

Fakta om reguleringa av torsk, hyse og sei i nord i 2026

 

Avsetningar og fordeling av kvotar:

  • Open gruppe blir tildelt ein del av norsk totalkvote på 6,62 prosent, det vil seie 9 257 tonn torsk.
  • Det blir avsett 880 tonn torsk, 319 tonn hyse og 156 tonn sei til forskings- og undervisningsføremål.
  • Det blir avsett 7 000 tonn torsk, 300 tonn hyse og 2 000 tonn sei til fritids-, ungdoms- og turistfiske.
  • Det blir sett av 2 543 tonn torsk, 953 tonn hyse og 1 397 tonn sei til rekrutteringskvotar i lukka gruppe (tidlegare rekrutteringsordning).
  • Det blir sett av 450 tonn torsk, 50 tonn hyse og 255 tonn sei til rekrutteringskvotar i open gruppe (ny rekrutteringsordning).
  • Det blir avsett 350 tonn sei til agnføremål.
  • Det blir sett av 3 000 tonn til kystfiskeordninga i open gruppe.
  • Det blir avsett 500 tonn til levandelagring. Kvotebelastninga skal utgjere 60 prosent av kvantumet på sluttseddelen. Ordninga startar 1. februar og varer ut året, eller så lenge det er dekning innanfor avsetninga.
  • Ferskfiskordninga for fartøy som fiskar med konvensjonelle reiskapar blir vidareført i 2026 med 6 612 tonn i lukka gruppe og 806 tonn i open gruppe.

Kvotereguleringar i 2026

Torsk

  • Inntil 10 prosent av fartøykvoten og gruppekvoten kan overførast til påfølgjande kvoteår.
  • Alle fartøygrupper i lukka gruppe blir regulerte med fartøykvotar utan overregulering.
  • Samfiske mellom to fartøy med same eigar blir avvikla, men vidareført mellom fartøy med ulike eigarar.
  • Ferskfiskordninga for fartøy som fiskar med konvensjonelle reiskapar blir vidareført i 2026 med 6 612 tonn i lukka gruppe og 806 tonn i open gruppe. Ordninga gjeld frå 29. juni med ein kvotebonus på 20 prosent på vekebasis. Blåsteinbit, skate og hyse under 0,8 kg rund vekt skal ikkje reknast med.
  • Fartøy som fiskar i open gruppe blir regulerte med maksimal­kvotar og eit garantert kvantum.
  • Alderstillegget for menn under 30 år og kvinner under 40 år blir vidareført med 2 tonn.
  • Kvotetillegget til kystfiskeordninga blir sett til 3,5 tonn per fartøy.

 

Hyse

  • Inntil 10 prosent av gruppekvoten kan overførast til påfølgjande kvoteår.
  • Konvensjonelle havfiskefartøy, torske- og seitrålarar blir regulerte med fartøykvotar.
  • Lukka gruppe blir regulert med maksimal­kvotar med varierande overregulering og eit garantert kvantum.
  • Open gruppe får fritt fiske frå årets byrjing og eit garantert kvantum i botn.

 

Sei

  • Kvotefleksibilitet mellom kvoteår blir vidareført i 2026 som i 2025.
  • Notfartøy med heimelslengd under 15 meter får overreguleringa som garantert kvantum, medan fartøy over 15 meter blir regulerte med maksimal­kvotar og eit garantert kvantum.
  • Konvensjonelle havfiskefartøy med seigarnløyve får fartøykvotar med låg overregulering.
  • Trålarane får fartøykvotar utan overregulering.
  • Fartøy som fiskar i lukka gruppe med konvensjonelle reiskapar får maksimal­kvotar og eit garantert kvantum.
  • Open gruppe får fritt fiske frå årets byrjing og eit garantert kvantum i botn.

 

Stengde område langs kysten av Aust-Finnmark

Området mellom Kinnarodden og Svartnes lykt i Aust-Finnmark blir stengt for fartøy på eller over 15 meter største lengd for fiske med snurrevad innanfor 4 nautiske mil frå grunnlinja frå og med 1. april til og med 15. juni.
Fiskeridirektoratet kan likevel opne for fiske dersom innblandinga av torsk, hyse og sei under minstemål til saman er under 15 prosent i tal i dei enkelte fangstane.

 

Minstemålsproblematikk

I 2026 blir det innført førehandstenging av felt for seinotfiske, og det blir stilt krav om både lengdemåling, prøvefiske og rapportering av resultata til styresmaktene. Fiskeridirektoratet vil i dialog med næringa avklare gjennomføringa av dette før seinotfisket startar.