Samferdselsministeren opna Rv. 706 Nydalsbrua i Trondheim
Pressemelding | Nr: 106/2023 | Dato: 17.10.2023 | Samferdselsdepartementet
- Brua skulle etter plana opne i juni 2024. No står vi her i dag, åtte månadar før tida, og opnar brua. Eg vil derfor rose Statens vegvesen, Skanska og dei andre entreprenørane som har bidratt til det gode samarbeidet, sa samferdselsminister Jon-Ivar Nygård i sin tale då han opna Nydalsbrua.
Måndag 16. oktober kutta samferdselsministeren snora for Rv. 706 Nydalsbrua i Trondheim. Den nye brua går over Nidelva og vil bidra til betre trafikkflyt mellom aust og vest i byen.
- Eit betre samband mellom aust og vest vil avlaste sentrum for gjennomgangstrafikk, og Sluppen bru vil kunne bli ei bru for sykkel og gonge. Dette er viktig om vi skal nå nullvekstmålet for personbiltrafikk i byene våre. Samtidig gir Nydalsbrua betre framkomme for næringstransporten, som treng føreseielegheit. Dette er eit bra prosjekt for heile Trondheim, seier Nygård om opninga.
Ein del av Miljøpakken i Trondheim
Prosjektet er ein del av Miljøpakken i Trondheim Den nye firefelts brua skal erstatte dagens Sluppen bru, som blir gang- og sykkelbru. Arbeidet med brua starta i 2020 og prosjektet har eit kostnadsanslag på om lag 1,8 milliardar kroner.