– Fleire stader i Nord-Noreg er det særskilde utfordringar med fråflytting, samstundes som nokre av dei har store etableringar innan forsvaret og næringslivet. Dette stiller store krav til kommunane sin kompetanse til å planlegge. Dette skal vi no hjelpe dei med, seier kommunal- og distriktsminister Bjørnar Skjæran

Spesialiserte planmiljø skal hjelpe kommunane med å legge til rette for prosjekt med stor samfunnsmessig betydning som til dømes mineralprosjekt og forsvar. Satsinga skal òg styrke det ordinære planarbeidet. Pengane skal gå til stillingar og administrasjonsutgifter i fylkeskommunane.

– Styrkinga følger opp løftet i nordområdestrategien om betre samordning mellom kommunar, fylkeskommunar og staten. Målet er å utnytte dei offentlege ressursane betre og styrke kommunane sin kapasitet til å styre, planlegge og handtere omstilling, seier Skjæran.

Dersom det i periodar ikkje er slike større prosjekt, skal fylka hjelpe kommunane med andre planoppgåver, som til dømes oppdatering av gamle planar.

– Kommunar og fylkeskommunar har viktige oppgåver med å disponere areala. Samspelet mellom dei ulike forvaltingsnivåa og dei ulike sektormyndigheitene er avgjerande for å lykkast med regjeringa si satsing på betre og meir effektive arealprosessar, seier Skjæran.