Regjeringa foreslår å auke løyvingane til digitalisering og konsesjonsbehandling av fornybar kraft i NVE med totalt 37,5 millionar kroner. Målet er å styrkje og effektivisere saksbehandlinga av nye kraftprosjekt.

NVEs arbeid med tilsyn og godkjenning av detaljplanar skal også styrkast, slik at utbyggingar som allereie har fått konsesjon og framtidige utbyggingar kan realiserast raskare.

– Regjeringa har i fleire år ført ein politikk for meir kraft, meir nett og lågare straumrekningar. Det er gledeleg å sjå at trenden i talet på konsesjonssøknader no aukar. Me foreslår derfor å auke løyvingane til NVE for å styrkje og effektivisere saksbehandlinga av nye kraftprosjekt. Det bidreg til raskare og betre behandling av konsesjonssøknader. I tillegg styrkjer me NVEs arbeid med digitalisering, seier energiminister Terje Aasland.

Forslaget frå regjeringa omfattar:

  • Ein auke på 23 millionar kroner for å styrkje digitaliseringsarbeidet i NVE og vidareutvikle digitale tenester og system. Midlane skal nyttast til auka saksbehandlingskapasitet og til å handtere ei auka datamengd i NVE, og til oppgradering og vidareutvikling av IKT-system.
  • Ein auke på 14,5 millionar kroner for å styrkje saksbehandlingskapasiteten i NVE, knytt til nett- og kraftutbygging og arbeidet med tilsyn og godkjenning av detaljplanar.

Fleire ressursar til konsesjonsbehandling blir følgde opp med ei styrking av NVEs arbeid med tilsyn og godkjenning av detaljplanar. Dette vil bidra til at utbyggingar som allereie har fått konsesjon og framtidige utbyggingar kan realiserast raskare.