I norske domstolar skal saker fordelast tilfeldig mellom dommarane, etter det som er kjent som tilfeldigheitsprinsippet. Men innhaldet i prinsippet har vore uklart. No følgjer regjeringa opp Domstolkommisjonen si tilråding om å lovfeste prinsipp og kriterium for saksfordelinga, for å sikra ei uavhengig og upartisk saksbehandling, som er lik for alle tingrettane og lagmannsrettane.

Regjeringa foreslår:

  • å lovfeste prinsippet om at saker som hovudregel skal fordelast tilfeldig mellom dommarane, med mindre saklege grunnar tilseier at prinsippet bør fråvikast
  • at å omfordele ei sak mot ein dommars vilje skal grunngjevast skriftleg
  • å lovfeste reglar om saksfordelinga i domstolar som har fleire rettsstader
  • å oppheve tilgangen regjeringa har til å instruera om saksfordelinga i domstolane, og flytte denne kompetansen til Stortinget

Nye reglar for lyd- og biletopptak

I løpet av 2025 skal alle tingrettane få utstyr til å gjennomføre lyd- og biletopptak, men dagens reglar om lyd- og biletopptak er utforma med tanke på ulike prøveprosjekt. Derfor foreslår regjeringa no at reglane om avspeling av slike opptak i lagmannsretten skal gjelda for alle lagmannsrettane, og ikkje som i dag «i utpeika domstolar». Dermed vil alle lagmannsrettane ha tilgang til spele av opptak frå tingretten i ankebehandlinga.

Regjeringa  håpar at dette vil bidra til ei reell overprøving i lagmannsretten, i staden for ei fullstendig ny behandling av saker som allereie er behandla i tingretten. Dette kan bidra til å dempa auken i sakskostnadsnivået, som har vore stor dei seinare åra.

Andre endringar basert på Domstolkommisjonen sine forslag

Tysdag 21. mai 2024 vedtok Stortinget endringar i Grunnlova som skulle sikra eit heilskapleg grunnlovsvern for domstolane. Endringane bygde på forslag frå Domstolkommisjonen. Kommisjonen foreslo i forlenging av grunnlovsendringane også endringar i domstollova, som departementet no følgjer opp i denne proposisjonen; å lovfesta dommartalet i Høgsterett, og at kompetansen til regjeringa til å dele Høgsterett inn i avdelingar blir overført til høgsterettsjustitiarius.