Utvidar to verneområde med viktig våtmark
Nyheit | Dato: 23.10.2026 | Klima- og miljødepartementet
Vern er eit sentralt verkemiddel for å sikre verdifulle naturområde mot framtidige inngrep. Derfor har regjeringa i dag vedtatt å utvide to naturreservat i Trøndelag og Innlandet.
– Noreg har ein fantastisk natur som vi må ta vare på, og områda vi no vernar er del av eit viktig arbeid med å bevare leveområde der truga artar kan få betre føresetnader for å leve og trivast, seier klima- og miljøminister Sigrun Aasland.
Meløyfloen naturreservat
Meløyfloen naturreservat ligg i Folldal kommune i Innlandet fylke. Dette blir no utvida med 533 dekar*, slik at totalarealet til naturreservatet blir 5 638 dekar.
Utvidinga omfattar resten av våtmarkssystemet langs elva Einunna, inkludert den meandrerande delen av elva. At elva er meandrerande vil seie at ho slynger seg i store, regelmessige svingar gjennom landskapet, i staden for å renne rett fram.
Området har svært store naturverdiar med fleire truga naturtypar, eit rikt fugleliv, ni raudlista karplanter. Her er òg ei rekke raudlista fugleartar, inkludert vipe, myrhauk, storspove og fiskemåke. Vidare er området er gyte- og oppvekstområde for aure og blir brukt av villrein.
Utvidinga vil styrke den økologiske funksjonen til verneområdet, gi ei meir hensiktsmessig avgrensing og beskytte fleire raudlista arter og naturtypar som ikkje finst innanfor dagens reservat.
Kaldvassmyra naturreservat
Kaldvassmyra naturreservat ligg i Verdal kommune i Trøndelag fylke. Dette har blitt utvida med cirka 60 dekar, slik at totalarealet til naturreservatet no blir 480,8 dekar.
Utvidinga omfattar mellom anna den sterkt truga naturtypen platåhøgmyr med nasjonal verneverdi og vil gi ei meir heilskapleg avgrensing av verneområdet. Det samla naturreservatet er leveområde for eit rikt artsmangfald med over 200 karplanteartar, 110 fugleartar og fleire truga naturtypar. Formålet er òg å ta vare på det samiske naturgrunnlaget.
Utvidinga styrkar vernet av eit nasjonalt viktig myrområde og bidrar til å sikre truga naturtypar, viktige økologiske funksjonar og et rikt biologisk mangfald.
*Eitt dekar svarer til 1000 m².
- Vedlegg 1 - Forskrift om vern av Meløyfloen naturreservat, Folldal kommune, Innlandet 23.10.2026.pdf
- Vedlegg 2 - Forskrift om vern av Kaldvassmyra naturreservat, Verdal kommune, Trøndelag 23.10.2026.pdf
- Vernekart Kaldvassmyra naturreservat.pdf
- Vernekart Meløyfloen naturreservat.pdf
- Vernet vi no gjennomfører starta på bakgrunn av Noreg sin førre handlingsplan for naturmangfald (Meld. St. 14 (2015-2016) Natur for livet). Denne meldinga seier mellom anna at vi skal sikre eit representativt utval norsk natur for framtida gjennom å verne naturtypar og økosystem som i dag er mindre godt dekka av vern.
- Arbeidet med å ta vare på verdifull natur er ytterlegere forankra i Naturmeldingen (Meld. St. 35 (2023-2024) Bærekraftig bruk og bevaring av natur – Norsk handlingsplan for naturmangfold) og handsaminga av denne i Stortinget. Denne meldinga seier mellom anna at verneprosessar som er sett i gong knytt til supplerande vern skal førast vidare.
- Områda som blir vurdert og utgreidd for vern i dette arbeidet skal bidra til å dekke manglane i eksisterande verneområde.
- Områda skal òg bidra til å danne økologiske nettverk og gjere norsk natur meir motstandskraftig mot klimaendringar.
- Basert på område Miljødirektoratet har identifisert som aktuelle for slikt vern, vil dette vernet omfatte inntil 600 kvadratkilometer, i hovudsak mindre område med våtmark, kulturlandskap og ope lågland.