Vil innføre ny ordning for sletting av studielån

– Det er mangel på kompetanse over heile landet, og mangelen merkast mest i distrikta og i Nord-Noreg. Derfor vil vi slette 25 000 kroner av studielånet årleg i inntil tre år for dei som bur i dei 88 minst sentrale kommunane i Noreg. På same tid doblar vi satsen for gjeldsslette for dei som bur i innsatssona i Finnmark og Nord-Troms, seier forskings- og høgare utdanningsminister Sigrun Aasland (Ap).

Prioriterer dei minst sentrale kommunane og innsatssona

Regjeringa vil bruke ordninga til å snu den negative utviklinga med fråflytting og aukande aldring i dei minst sentrale distriktskommunane, og få fleire med rett kompetanse til å busetje seg der.

– Med ordninga kan eit ungt nyutdanna par som bur i dei 88 minst sentrale  distriktskommunane få sletta opp mot 150 000 kroner av studiegjelda over tre år, seier Aasland.

– Vi held òg fram satsinga i innsatsona i Finnmark og Nord-Troms. Der doblar vi satsen for gjeldsslette, frå 30 000 kroner til 60 000 kroner. På tre år kan eit par få 360 000 kroner i samla gjeldsslette, seier Aasland.  

Justering sidan 2025-budsjettet

Ordninga for distriktskommunane har vore på høyring. Regjeringa har målretta ho slik at dei som bur i dei minste kommunane i sentralitetssone 6 kan få sletta studielån i opptil tre år. Ordninga gjeld ikkje for kommunar i sentralitetssone 5, slik det tidlegare har vorte føreslått.

Eit nytt vilkår gjeld i distriktsordninga og i innsatssona: Berre gjeld frå fullførte studiepoeng i høgare utdanning eller høgare yrkesfagleg opplæring kan bli sletta.

– Det er krevjande økonomiske tider, og regjeringa har måtte gjere prioriteringar. Vi meiner den nye ordninga framleis er med på å styrke distrikta. No gjer vi det lettare for kvar fjerde kommune og store deler av distrikts-Noreg å trekke til seg folk med rett kompetanse, seier Aasland.