2 Endringar i statsbudsjettet 2025
Kap. 1800 Energidepartementet
Post 01 Driftsutgifter
Departementet foreslår å redusere løyvinga med 9 mill. kroner, til om lag 258,1 mill. kroner. I tillegg til auka refusjonar knytte til foreldrepermisjon og sjukefråvær har vakansar bidratt til reduserte lønns- og pensjonsutgifter i 2025.
Post 21 Spesielle driftsutgifter, kan overførast, kan nyttast under postane 50, 71 og 72
Departementet foreslår å auke løyvinga med 12 mill. kroner, til 49,3 mill. kroner. Årsaka er auka utgifter til utgreiings- og utvalsarbeid og kulturminneundersøkingar i regulerte vassdrag i regi av Riksantikvaren. Kulturminneundersøkingane er finansierte av sektoravgift for kulturminnevern i regulerte vassdrag, som blir inntektsført under kap. 5582, post 70 Bidrag til kulturminnevern i regulerte vassdrag.
Post 70 Tilskot til internasjonale organisasjonar mv.
Departementet foreslår å redusere løyvinga med 0,4 mill. kroner, til 14,1 mill. kroner, som følge av endra valutakursar.
Kap. 1810 Sokkeldirektoratet
Post 01 Driftsutgifter
Departementet foreslår å redusere løyvinga med 5 mill. kroner, til 403,5 mill. kroner. Årsaka er lågare aktivitet innanfor sektoravgiftsfinansierte aktivitetar, jf. tilsvarande reduksjon under kap. 5582, post 74 Sektoravgifter under Sokkeldirektoratet.
Post 23 Oppdrags- og samarbeidsverksemd, kan overførast
Departementet foreslår å auke løyvinga med 2 mill. kroner, til 49,5 mill. kroner, som følge av auka utgifter til gjennomføring av seminar i Norad-programmet Hav for utvikling. Auken blir dekt inn av ein tilsvarande inntektsauke under kap. 4810, post 02 Oppdrags- og samarbeidsinntekter.
Kap. 1820 Noregs vassdrags- og energidirektorat
Post 01 Driftsutgifter
Departementet foreslår å auke løyvinga med 5 mill. kroner, til 960 mill. kroner, som følge av administrative meirutgifter i samband med innføringa av straumstønad og Noregspris for fjernvarme.
Post 25 Krise- og hastetiltak i samband med flaum- og skredhendingar, kan overførast, kan nyttast under post 61
Departementet foreslår å legge stikkordet «kan overførast» til posten, jf. forslag til vedtak III. Bakgrunnen er at det ofte er usikkert når utbetalingane for krise- og hastetiltak etter flaum og skred kan skje. Erfaringar frå Noregs vassdrags- og energidirektorat (NVE) viser at prosjekt ofte blir forseinka, slik at utbetalingane må flyttast til påfølgande budsjettår. Tilsvarande stikkord er foreslått for 2026, jf. Prop. 1 S (2025–2026) for Energidepartementet.
Post 45 Større utstyrsinnkjøp og vedlikehald, kan overførast, kan nyttast under post 22
Departementet foreslår å auke løyvinga med 8 mill. kroner, til 40 mill. kroner. Auken heng saman med førebuande arbeid og investeringar for å betre overvakinga av det ustabile fjellpartiet Indre Nordnes i Kåfjord kommune i Troms. Fjellpartiet er vurdert som eit høgrisikoobjekt, og dei sesongbaserte rørslene har auka kraftig. Ustabile fjellparti med høg risiko blir kontinuerleg overvaka av NVE.
Post 61 Tilskot til krise- og hastetiltak i samband med flaum- og skredhendingar, kan overførast, kan nyttast under post 25
Departementet foreslår å legge stikkordet «kan overførast» til posten, jf. forslag til vedtak III. Det visast til omtale under kap. 1820, post 25 Krise- og hastetiltak i samband med flaum- og skredhendingar.
Post 75 Straumstønadsordning, overslagsløyving
Departementet foreslår å auke løyvinga med 900 mill. kroner, til 4 300 mill. kroner. Løyvinga er basert på ein terskelverdi på 75 øre per kWh, faktisk utbetalt stønad til og med september 2025, forbruksprofilen i hushalda frå 2024 og anslag på straumprisar for 2025 baserte på terminprisar frå oktober 2025.
Kostnadsanslaget for straumstønadsordninga er usikkert. Kor høge utgifter staten får, kjem an på kor mange som beheld ordninga ut året, og korleis straumprisane og straumforbruket utviklar seg. Statistikk frå Elhub viser at per 9. november 2025 hadde om lag 47 prosent av bustadene i Sør-Noreg bestilt Noregspris. I det oppdaterte kostnadsanslaget for 2025 er det derfor lagt til grunn at 50 prosent av bustadene i Sør-Noreg (NO1, NO2 og NO5) beheld straumstønadsordninga, og at alle i Midt- og Nord-Noreg (NO3 og NO4) fell inn under ordninga.
Løyvinga skal dekke utbetaling av stønad for straumforbruk frå desember 2024 til og med november 2025. Stønad for straumforbruk i desember 2025 blir utbetalt i januar 2026.
Post 76 Stønad til hushaldsskundar av nærvarmeanlegg, kan overførast
Departementet foreslår å redusere løyvinga med 4 mill. kroner, til 1 mill. kroner, fordi utbetalingane venteleg blir lågare enn føresett. Løyvinga omfattar straumstønad til hushaldskundar av nærvarmeanlegg som baserer seg på straum.
Post 78 Noregspris for fjernvarme, overslagsløyving
Departementet foreslår å auke løyvinga med 33 mill. kroner, til 98 mill. kroner. Løyvinga er basert på ein referansepris på 40 øre per kWh eksklusiv meirverdiavgift, anslag på straumprisar baserte på terminprisar frå oktober 2025 og forbruk opp til 4 500 kWh per månad for bustader og opp til 1 000 kWh per månad for fritidsbustader.
Kostnadsanslaget for ordninga er usikkert. Kor høge utgifter staten får, kjem an på kor mange som vel Noregspris ut året, og korleis straumprisane og -forbruket utviklar seg. I kostnadsanslaget for 2025 er det lagt til grunn at 70 prosent av bustadene i Sør-Noreg (NO1, NO2 og NO5) vel Noregspris, og at alle i Midt- og Nord-Noreg (NO3 og NO4) fell inn under straumstønadsordninga.
Post 79 (Ny) Straumstønad for fjernvarme, overslagsløyving
Departementet foreslår å løyve 6 mill. kroner til straumstønad for fjernvarme. Løyvinga er basert på ein terskelverdi på 75 øre per kWh og anslag på straumprisar baserte på terminprisar frå oktober 2025. Det er tidlegare gitt fullmakt til å utgiftsføre straumstønad for fjernvarme utan løyving, jf. Prop. 146 S (2024–2025) og Innst. 540 S (2024–2025), vedtak LII.
Kap. 1825 Energieffektivisering og -omlegging
Post 50 Klima- og energifondet, verkemiddel for energieffektivisering
Departementet foreslår å auke løyvinga med 200 mill. kroner, til 1 577 mill. kroner. Løyvinga skal gå til energieffektivisering, mellom anna i hushaldssektoren. Departementet finansierer auken til same overordna formål ved å omdisponere midlar frå ordninga med energitiltak i kommunale bygg, sjå omtale under kap. 1825, post 60 Tilskot til energitiltak i kommunale bygg.
Departementet foreslår vidare ei fullmakt til å overskride løyvinga mot tilsvarande meirinntekter under kap. 5582, post 73 Påslag på nettariffen til Klima- og energifondet, jf. forslag til vedtak II. Tilsvarande fullmakt er foreslått for 2026, jf. Prop. 1 S (2025–2026) for Energidepartementet, forslag til vedtak II.
Post 60 Tilskot til energitiltak i kommunale bygg, kan overførast
Departementet foreslår å redusere løyvinga med 200 mill. kroner, til 250 mill. kroner, som følge av lågare etterspørsel etter energitiltak i kommunale bygg i 2025. Departementet foreslår å omdisponere reduksjonen til kap. 1825, post 50 Klima- og energifondet, verkemiddel for energieffektivisering, mellom anna i hushaldssektoren.
Kap. 1850 Klima, industri og teknologi
Post 70 Gassnova SF
Departementet foreslår å redusere løyvinga med 28 mill. kroner, til 90 mill. kroner, som følge av vakansar og redusert konsulentbruk.
Post 71 Teknologisenter Mongstad
Departementet foreslår å redusere løyvinga med 20 mill. kroner, til 69 mill. kroner. Årsaka er avrekning i samband med avslutninga av rekneskapen for 2024 og lågare kostnader i 2025.
Kap. 4810 Sokkeldirektoratet
Post 01 Gebyrinntekter
Departementet foreslår å redusere løyvinga med 2 mill. kroner, til 29,9 mill. kroner. Årsaka er at det er venta lågare gebyrinntekter frå tildeling i førehandsdefinerte område på norsk kontinentalsokkel (TFO-søknader) og petroleumsregisteret.
Post 02 Oppdrags- og samarbeidsinntekter
Departementet foreslår å auke løyvinga med 2 mill. kroner, til 49,5 mill. kroner. Sjå nærmare omtale under kap. 1810, post 23 Oppdrags- og samarbeidsverksemd.
Kap. 4860 Havindustritilsynet
Post 01 Gebyrinntekter
Departementet foreslår å redusere løyvinga med 2 mill. kroner, til 87 mill. kroner. Det heng saman med at ressursar har blitt flytta frå gebyrfinansierte aktivitetar til aktivitetar som er finansierte av sektoravgifter, jf. kap. 5582, post 75 Sektoravgifter under Havindustritilsynet.
Kap. 5582 Sektoravgifter under Energidepartementet
Post 70 Bidrag til kulturminnevern i regulerte vassdrag
Departementet foreslår å auke løyvinga med 6,1 mill. kroner, til 18,5 mill. kroner, fordi fleire saker om vilkårsrevisjonar og fornying av konsesjonar er venta å bli ferdigbehandla i 2025. Anslaget er usikkert.
Post 73 Påslag på nettariffen til Klima- og energifondet
Departementet foreslår ei fullmakt til å gjere unntak frå kontantprinsippet ved å bruttoføre inntektene frå påslaget og overføringa av tilsvarande utgifter til Klima- og energifondet, jf. forslag til vedtak IV. Fullmakta inneber at inntektene frå påslaget og overføringa til fondet kan førast brutto i statsrekneskapen sjølv om innbetalingane skjer direkte til Klima- og energifondet. Tilsvarande fullmakt er foreslått for 2026, jf. Prop. 1 S (2025–2026) for Energidepartementet, forslag til vedtak VII.
Post 74 Sektoravgifter under Sokkeldirektoratet
Departementet foreslår å redusere løyvinga med 5 mill. kroner, til 40 mill. kroner. Sjå nærmare omtale under kap. 1810, post 01 Driftsutgifter.
Post 75 Sektoravgifter under Havindustritilsynet
Departementet foreslår å redusere løyvinga med 7 mill. kroner, til 138 mill. kroner. Det heng saman med ei omprioritering der ressursar har blitt flytta til aktivitetar innanfor sikring og samfunnssikkerheit som ikkje er gebyr- eller sektoravgiftsfinansierte.